Një fuoristradë tip BMW X5 që transportonte lëndë narkotike është kapur mbrëmjen e së enjtes në autostradën Tiranë-Durrës në dalje të Vorës.
Makina është ndaluar nga shërbimet e Policisë Rrugore pasi efektivët vunë re lëvizje të dyshimta të mjetit. Policia i bëri shenjë mjetit që të ndalonte dhe të hapte krahun. Në bagazhin e BMW-së u gjetën disa kubikë me kanabis të cilat transportoheshin me këtë automjet.
Policia arrestoi shoferin e makinës, E.D. 30 vjeç i dënuar më parë për vjedhje. Ndërsa është shpallur në kërkim pasagjeri A.K. 29 vjeç, i cili u hodh nga makina para se të ndalohej nga policia. Ai mundi të largohej, por uniformat blu mundën ta identifikonin dhe e shpallën në kërkim.
Hetimet vijojnë për të zbuluar origjinën ku ishin blerë kubikët me kanabis dhe ku do të transportoheshin.
/a.r
