Kryeministri i Shqipërisë, Edi Rama ka ndarë me publikun një mesazh këtë të martë dhe një video të re që tregon përparimin e rrugëve kombëtare në vend.
Në postimin e tij, Rama e përshkruan këtë zhvillim si një “buqetë e infrastrukturës shqiptare”, duke theksuar se rrugët e reja kanë kontribuar në shkurtimin e distancave dhe përmirësimin e lidhshmërisë mes qyteteve.
“Rrugët kombëtare të reja, një buqetë e infrastrukturës shqiptare që ka shkurtuar distancat,” shkruan kryeministri në postimin e tij, duke i ftuar qytetarët të shohin investimet që po ndryshojnë fytyrën e vendit.
Video e publikuar shfaq pamje të rrugëve të rinovuara dhe të ndërtuara së fundmi. Me këtë postim, Rama rikujton përkushtimin e qeverisë për investime të qëndrueshme në infrastrukturë, që sjellin ndryshime konkrete dhe përfitime të prekshme për gjithë qytetarët shqiptarë.
Para fitores së 11 Majit, ai pati theksuar se një nga pikat kyçe të qeverisjes së Partisë Socialiste dhe në mandatin e katërt synohet një transformim i mëtejshëm i rrjetit rrugor dhe hekurudhor në vend, duke premtuar të ndërtojë edhe 700 kilometra të tjera rrugë, dhe të përfundojë disa prej projekteve më strategjike për vendin.
