Nga Enver Robelli
Të hënën rreth orës 20:00 ekstremisti pseudofetar K.F., shtetas austriak dhe i Maqedonisë së Veriut, me banim në Vjenë, nisi një sulm kundër civilëve në kryeqytetin austriak. Mori udhë te një sinagogë, e cila ishte e mbyllur, dhe vazhdoi drejt sheshit Ruprechtsplatz. Këto ishin viktimat e tij, sipas një rekonstruksioni që ka bërë «Süddeutsche Zeitung».
Viktima e parë: Afër restorantit Salzamt ai vrau një gjermane 24-vjeçare, e cila punonte aty si kameriere dhe sapo e kishte dhënë provimin pranues në Shkollën e Lartë për Arte të Aplikuara.
Viktima e dytë: Pak metra më tutje vrasësi hapi zjarr dhe vrau një 21-vjeçar, shqiptar nga Veleshta, një fshat afër Strugës. Nga ky fshat rrjedh edhe e ëma e vrasësit, shkruan shtypi gjerman.
Viktima e tretë: Vrasësi vazhdoi rrugën drejt Kanalit të Danubit dhe në sheshin Schwedenplatz, para një McDonaldsi, vrau një austriak 39-vjeçar.
Viktima e katërt: Në këndin e rrugës Rabensteig K.F. plagosi aq rëndë një grua, saqë ajo vdiq më vonë në spital. Me atë rast terroristi plagosi edhe një polic, i cili u përpoq ta ndalë.
Të plagosurit: Në disa vende të tjera në qytet K.F. plagosi gjithsejtë 23 njerëz, disa rëndë. Nga alarmi i parë që arriti te policia deri te momenti kur njësitë speciale e vranë vrasësin, nuk kaluan më shumë se 10 minuta. Policia u alarmua në orën 20:00. Tre minuta më vonë policët e parë arritën në vendin e ngjarjes.
Dekorimi i policëve: Të enjten kancelari austriak Sebastian Kurz dekoroi me medalje dy policët që ekzekutuan vrasësin.
Mbyllja e xhamive radikale: Ministri i Brendshëm austriak ka paralajmëruar se në mbarë vendin do të mbyllen xhamitë që dyshohet se janë vatra të radikalëve. Po ashtu do të goditen strukturat islamiste. Janë mbyllur tashmë këto dy xhami të dyshimta në Vjenë: xhamia Melit-Ibrahim (në qarkun vjenez Ottakring) dhe xhamit Tevhid (në Wien-Meidling). Terroristi K.F. thuhet të jetë radikalizuar, mes tjerash, në xhaminë Melit-Ibrahim.
