Javën që vjen kush do të kalojë në Rrugën e Kombit duhet të paguajë. Tarifa do të jetë duke filluar nga 2.5 euro për motorët, 5 euro për autoveturat dhe deri në 22.5 euro për kamionët e tonazhit të rëndë. Pas lajmeve në media, qytetarët nga dita e djeshme kur u bë testimi i sporteleve i janë ankuar në Facebook kryeministrit duke e kundërshtuar tarifën, ndërsa Rama ka reaguar sot përmes një komenti në përgjigje të njërit prej komentuesve.
Rama thotë se nuk ka pagesë 10 euro, por është 5 euro dhe ky çmim paguhet kudo në rajon dhe është kontribut që shkon për mirëmbajtjen e rrugës. Gjithashtu kreu i qeverisë thekson se me taksën që do të paguhet do të përfundojë rruga, pasi është e ndërtuar pjesërisht.
“Nuk ka pagese 10 euro, eshte 5 euro, cmim qe paguhet kudo ne rajon dhe kontribut qe shkon per mirembajtjen e rruges, e cila u ndertua pjeserisht (nderkohe qe kompania do te perfundoje edhe ndertimin) dhe mbeti ne meshire te fatit nga pamundesia e mirembajtjes qe ka nje kosto jo te vogel!”. shkruan Rama në profilin e tij në ‘Facebook’.
Qytetarët shqiptarë, sidomos Kukësi e kanë kundërshtuar fuqishëm vendosjen e tarifës në Rrugën e Kombit, ndërsa në Kosovë ka pasur shumë reagime kundër këtij vendimi të qeverisë shqiptare. Megjithatë qeveria duket e vendosur dhe javën tjetër pritet që të nisë pagesa për të gjitha ata që do të kalojnë në Rrugën e Kombit.
ma.me
