Qëndrimi i Partisë Demokratike në lidhje me Rrugën e Kombit është tejet hipokrit, siç dëshmojnë edhe deklaratat e shkuara të bëra nga Kryeministri Berisha në lidhje me këtë rrugë.
Ndonëse PD sot proteston për vendosjen e një pagese prej 5 eurosh, kur ajo ishte në pushtet, Kryeministri haptazi pranonte se mirëmbajtja e rrugës nuk mund të përballohej nga buxheti i shtetit dhe theksonte se ajo duhet t’i kalonte me konçension një firme të madhe.
Në një takim në Petrelë me gazetarët, në gusht të vitit 2010, ndërsa premtonte se Rruga e Arbrit do të kompletohej në të gjithë gjatësinë e saj me dy korsi (premtim që nuk u mbajt kurrë), Berisha tha: “Ne e ndërtuam, për ta mirëmbajtur nuk e mirëmbajmë dot, sepse nuk kemi organizma të fuqishme, sipërmarrje shtetërore për mirëmbajtje kaq të fuqishme. Ne do të detyrohemi që atë t’ia japim një kompanie të madhe, siç bëjnë të gjitha vendet, që siç e keni dëgjuar, ose i japin me koncesion, ose i privatizojnë, sepse mirëmbajtja e tyre është një proces shumë i rëndësishëm”.
Megjithatë, sot, për interesa të ngushtë politikë PD ka kthyer pllakë dhe dënon një konçension, procedurat për të cilin i nisën ata vetë.
I ngjashëm është edhe qëndrimi i LSI, që gjithashtu i është bashkuar zhurmuesve kundër rrugës.
Ishte ministri Haxhinasto ai që finalizoi procedurën e koncensionit dhe ish-ministri Dervishaj, përsëri nga radhët e LSI, ai që vendosi firmën përfundimtare mbi koncensionin e Rrugës së Arbrit.
Pavarësisht kësaj, LSI sillet sikur nuk ka asnjë lidhje me këtë çështje, duke iu bashkuar zërave të partisë tjetër më të madhe në opozitë, kjo thjesht dhe vetëm për oportunizëm politik./Lexo.al
