Nëpërmjet një komunikate dërguar mediave, Dogana e Kosovës njofton se gjatë kësaj jave njësitet e Doganës kanë zhvilluar dy operacione të ndara, si rezultat i të cilave janë konfiskuar mallra, si dhe janë ndaluar persona që kontrabanduan mallra.
Siç njofton Dogana e Kosovës, në rastin e parë oficerët doganorë kanë ndjekur një kombi të dyshuar për kontrabandim në magjistrale Gjilan-Ferizaj.
“Pas dyshimeve fillestare oficerët kanë tentuar të ndalin këtë automjet por i njëjti nuk i është bindur urdhrave, por pas reagimit të oficerëve është bërë ndalimi i automjetit dhe legjitimimi i personit i cili e drejtojnë. Gjatë kontrollit janë hasur në mall pa prejardhje të kontrabanduar kryesisht tekstil dhe këpucë me vlerë mbi 6,000 euro. Palës i është shqiptuar kundërvajtja doganore derisa mallrat dhe kombi janë konfiskuar”, thuhet në komunikatë.
Ndërsa, në rastin e dytë, njësitet e doganës janë penguar gjatë tentimit për të ndaluar një kombi të dyshuar, ku një automjet “Golf III” ka tentuar të bllokonte rrugën.
“Njësitet tjera të Doganës janë angazhuar dhe kanë bërë të mundur ndalimin e të dy automjeteve si dhe legjitimimin e personave ku njëri prej tyre është prangosur dhe është hapur rast penal. Pas hapjes së kombit janë gjetur pije alkoolike të kontrabanduara nga Serbia (mallrat dhe kombi janë konfiskuar)”, thuhet në komunikatë.
Dogana thotë se në të dy rastet ka arritur të identifikojë automjetet duke iu falënderuar sistemeve të kamerave të cilat janë instaluar në automjetet e antikontrabandës, që mundësojnë identifikimin e personave dhe automjeteve.
Menaxhmenti i Doganës së Kosovës thotë se është i vendosur në luftimin dhe hetimin e të gjitha rasteve të kontrabandës, korrupsionit dhe dukurive të tjera negative.
“Për të bërë këtë dogana kërkon nga qytetarët që të vazhdojnë ta ndihmojnë Doganën duke lajmëruar raste në 0800 50 095 (pa pagesë), me mesazhe përmes 50 095 (pa pagesë) ose përmes postës elektronike në lajmro@dogana-ks.org.”
