Pamjet e para të këndit të lojërave për fëmijë në Parkun e Liqenit duket se kanë bindur jo vetëm skeptikët, por edhe një pjesë të atyre që e kundërshtuan atë për muaj me radhë. Mbështetja dhe komentet pozitive që albumi me fotot e këndit të lojërave i postuar nga kryebashkiaku i Tiranes, Erion Veliaj, ka bere jehone jo vetëm në gazetat online, por në të gjitha rrjetet sociale. Aq sa në vetëm pak orë albumi është shpërndarë mbi 1500 herë dhe është komentuar e pëlqyer nga qindra përdorues të rrjetit social Facebook.
Pjesa dërmuese e qytetarëve që kanë komentuar lidhur me këndin, kanë shprehur mbështetjen e tyre për punën e kryer, ndërsa nuk kanë nguruar të përgëzojnë kryetarin e Bashkisë, Erion Veliaj, për këmbënguljen që pati për ndërtimin e këtij këndi.
“Një mrekulli, për nipërit e mbesat tona, do gëzojmë edhe ne gjyshërit kur të shkojmë atje. Por jam i bindur që do shkojnë edhe ata që kundërshtuan, e do kënaqen, por edhe do bëjnë autokritikë në vetvete se bënë faje të rëndë që u kacafytën me policinë”, komenton në albumin e publikuar nga kryebashkiaku, Eqerem Cenaliu.
Ndërkohë që, një tjetër komentues që jeton jashtë vendit, Arjan Prendi, i kënaqur nga puna e kryer shprehet “Më falni se jetoj jashtë, nji pyetje kam: për këtë gjë fantastike u bë e gjithë ajo rrëmujë??”. “Mos harroni t’i bani ftese atyre qe qëlluan policet me gurë dhe dërrasa, qe ta shohin dhe pendohen për atë turpe që bënë. Ftoni kalamajtë e tyre qe ta shijojnë parkun por edhe “kontributin e prindërve”qe deshën ta pengojnë. Për kujtesë mos harroni ….!”, shkruan Qamil Llukaj.
“Një mrekulli! Më ka pëlqyer që në video dhe e kam dashur këtë kënd lojërash menjëherë. Shoqëria civile mund të protestojë për ajrin në Tiranë por jo për këtë kënd të mrekullueshëm lojërash për fëmijët. Bravo Erion! Sfida tjetër duhet të jetë cilësia e ajrit në Tiranë. Do doja shumë të dëgjoja që është ulur me kaq apo aq”, komentoi gazetarja, Magdalena Alla.
Por, nëse albumi me foto i këndit të lojërave është pëlqyer kaq shumë, qytetaret nuk kanë ngurruar të kritikuar qëndrimin që mbajti për këtë çështje, Presidenti i Republikës, Bujar Nishani. “Shumë bukur, mesa u duket negativët e shoqërisë civile me në krye karagjozin e Republikës nami e nishani qenka gërvirur së koti. Po tani çdo bëj krye karagjozi do e çoj parkun në gjykatë”, shkruan Dorian Lame.
Nishani postoi në faqen e tij në Facebook një album me foto nga këndi i lojërave kur ishte në ndërtim (të cilin edhe e ka sponsorizuar për të rritur shikueshmërinë), por komentuesit e kanë kryqëzuar me një lumë sulmesh, të cilat shpeshherë janë shoqëruar me tallje dhe shpoti ironike nga vetë Nishani.
Pas gjithë baltës, një gjë është e sigurt: Fëmijët e Tiranes do të kënaqen me 1 qershor!
