Autoriteti i Mbikëqyrjes Financiare pritet të marrë masa administrative për shoqëritë e sigurimit në lidhje me tarifat e TPL-së që ata rritën në datë 24 gusht. AMF ka njoftuar zyrtarisht se në mbledhjen që do të zhvillohet në datë 13 shtator do të vendosë : “Për tarifat e primit të sigurimit të detyrueshëm në sektorin e transportit dhe marrjen e masave administrative ndaj shoqërive të sigurimit”.
Por, sipas disa prej drejtuesve të shoqatave të sigurimit atyre ende nuk iu është dorëzuar zyrtarisht një njoftim në lidhje me këto masa, por shprehen se nëse ato do të miratohen nga ana e AMF-së ata janë të detyruar t’i paguajnë.
Sipas tyre, po vazhdon ‘lufta’ për të rujtur tarifat e rritura të policave të sigurimit TPL, pasi kjo është një e drejtë që atyre iua jep ligji, duke qenë se po operohet në një treg të liberalizuar. Ata thonë se llogaritjet e tyre aktuariale justifikojnë rritjen e tarifave në masën 20-25%.
Në datë 25 gusht, një ditë pas rritjes së çmimit të sigurimit të detyrueshëm, Autoriteti i Mbikëqyrjes Financiare deklaroi se : “shoqëria e sigurimit përcakton vetë tarifat e primit të sigurimit, sipas kushteve të tregut, ….”. Pra, tarifat e sigurimit të detyrueshëm janë të liberalizuara, duke i dhënë të drejtën shoqërive të sigurimit t’i përcaktojnë vetë ato, sipas kushteve të tregut. Bazuar në kuadrin ligjor e rregullativ, AMF nuk miraton çmimet e sigurimit, por miraton rregullat për përcaktimin e kushteve të përgjithshme të sigurimit të detyrueshëm, si dhe nivelin e provigjoneve teknike, që përfaqësojnë përgjegjësitë aktuale dhe të pritshme që rrjedhin nga kontratat e sigurimit”.
Por, disa ditë më vonë ajo i dërgoi një shkresë shoqërive të sigurimit të Jo-Jetës ku iu kërkonte të riktheheshin te tarifat e vjetra, pasi nuk kishin njoftuar në kohë AMF-në, sikundër e parashikon ligji.
Në lidhje me këtë në një prononcim të posaçëm për “Monitor” Autoriteti i Mbikëqyrjes Financiare u shpreh se : “Ky problem po ndiqet me prioritet nga ana e Autoritetit dhe jemi ne pritje të të dhënave që shoqëritë e sigurimit do të sjellin, për të bërë përllogaritjet tona aktuariale përfundimtare”.
Edhe Autoriteti i Konkurrencës po grumbullon të dhënat në treg në lidhje me tarifat e zbatuara nga ana e shoqërive të sigurimeve, në bazë të së cilave do të vendoset nëse do të hapet ose jo hetim./Monitor/a.m.
