Agjensia për Mbrojtjen e Konsumatorit ka nisur kontrollin në 15 tregje të shitjes me pakicë në Tiranë, vetëm dy javë para ardhjes së festave të fundvitit, kohë në të cilën tendenca e çmimeve vjen drejt rritjes. Rudina Hoxha, kryetarja e AMK, teksa inspektoi tregun e Uzinës Dinamo u bëri thirrje tregtarëve të afishojnë çmimet e produkteve që shesin, duke shtuar se nëse do të ketë abuzime për rrjedhojë do të procedohet me masa ndëshkimore deri në konsfiskimin e mallit.
“Do njoftohen organet tatimore, të cilët kanë kompetencë të marrin masa ndaj tregtare deri në konfiskim të mallit”, tha Rudina Hoxha, duke ju referuar rasteve ku do të konstatohet një abuzim me çmimet.
Nga ana tjetër, Bashkia e Kryeqytetit ka nisur prej disa ditësh aksionin për të mos lejuar tregtimin e gjësë së gjallë në ambiente publike, siç ka ndodhur çdo fundvit. Bashkia e Tiranës pritet të çelë këto ditë katër tregje provizore ku do të tregtohen në mënyrë të organizuar produktet që konsumohen me rastin e festave të fundvitit.
