Zëvendëskryeministri Arben Ahmataj i është përgjigjur kritikave të opozitës për keqmenaxhimin e krizës së çmimeve.
Gjatë fjalës së mbajtur në seancën plenare Ahmetaj, u shpreh se rritja e çmimeve është rrjedhojë e luftës në Ukrainë dhe theksoi se qeveria ka marrë politikat e duhura sociale në ndihmë të qytetarëve.
Gjithashtu ai shtoi se e ardhmja e Evropës nuk do jetë e thjeshtë, pasi pasojat e luftës në Ukrainë do të vazhdojnë edhe më gjatë.
“Mos harroni që ne këtu me atë përgjegjësi që duhet të kemi, duhet të themi se invazioni rus në Ukrainë nuk i ka pasojat vetëm sot, por e ardhmja e Evropës nuk do të jetë e thjeshtë, pasi mungojnë të mbjellat dhe të korrat këtë vit, rrugët e transportit dhe furnizimit kanë problematikat e tyre, konseguenca e çmimit të energjisë, rrit kostot e prodhimit, ul produktivitetin, paniku në tregje ndërkohë bën të njëjtën gjë.
A mund të bëjë qeveria më tepër? Po patjetër? Çfarë ka bërë qeveria më tepër? Ka furnizuar terrenin ekonomik me paketa ndihme subvencionesh, me politika sociale, me subvencion të energjisë, me një politikë të tërë për rindërtimin. 352 kompani kanë përfituar kontrata nga rindërtimi. Jepni informacion të denjë. Janë gati 212 kompani që kanë përfituar kontrata nga Fondi i Zhvillimit. A e dini se sa kompani merrnin atëherë tendera rrugësh, dikur? 4 kompani e gjysmë. Një proces transparent me shumë njësi kontraktuese dhe me 352 kompani”, tha Ahmetaj.
Gjithashtu Ahmetaj u ndal dhe tek heqja e taksimit për biznesin e vogël, të cilin e cilësoi si një lehtësim për shumë familje që mbahen nga ky aktivitet ekonomik.
“Ne nuk krahasohemi fare me kohën e PD kur keni qenë në pushtet. Janë dy botë të ndryshme që nuk kanë të krahasuar. Ka një statistikë, ka edhe një të vërtetë përtej statistikës. Dhe do i them. Tatim fitimi për kompanitë ka qenë 15%. Sot biznesi i vogël paguan zero. Një qeveri oligarkësh e bën zero tatimin për bizneset e vogla? Pyetja është retorike. Shqipëria ka probleme sa të duash. Jemi në moment krize. Sa më i madh të jetë inflacioni aq më gërryes kthehet për të ardhurat”, tha Ahmetaj.
/e.d
