Rajoni i Ersekës ka mbetur pa energji elektrike dhe shkak për këtë është bërë rrëzimi i shtyllave të tensionit të lartë. Përmes një deklarate për shtyp, Operatori i Sistemit të Transmetimit (OST), njofton se “sot në orët e pasdites në afërsi të rrugës së Voskopojës në Korçë, është konstatuar një akt terrorist për rrëzimin e një shtylle të tensionit të lartë, si pasojë e të cilës ka mbetur pa energji rajoni i Ersekës”.
Pas verifikimeve të bëra në terren është konstatuar se janë rrëzuar shtyllat nr. 8 dhe nr. 9 në afërsi të rrugës së Voskopojës. Dyshohet se rrëzimi i shtyllave ka ardhur si pasojë e veprimeve vandale dhe të papërgjegjshme, u dëmtuan atyre konstruksionet metalike, çka ka shkaktuar dhe rënien e tyre.
“Menjëherë është njoftuar Policia e Shtetit, e cila në bashkëpunim me prokurorinë kanë nisur punën për zbardhjen e kësaj ngjarjeje të rëndë dhe zbulimin e autorëve të saj”, njofton OST.
Ndërkohë masat janë marrë në kohë rekord dhe është rikthyer furnizimi me energji elektrike për qytetin përmes linjave të tjera.
/a.r
