Sot shënohen 25 vite nga dita kur qytetarët e Tiranës rrëzuan nga sheshi “Skënderbej” shtatoren e diktatorit Enver Hoxha. Me këtë rast, Partia Demokratike ka mbajtur një aktivitet për të përkujtuar këtë ditë historike. Kryetari i opozitës Lulzim Basha, gjatë fjalimit të tij nuk kurseu kritikat për qeverinë akltuale, duke e akuzuar atë se ndjek të njëjtat praktika si modeli i diktaturës. Sipas Bashës “’Hoxhizmi’ trashëgohet nga pasuesit por nuk mund të jetë model i qeverisjes sonë.”
“Në këtë 25 vjetor, 20 shkurti ndan dy modele, dy botë. Ne që shikojmë dhe mësojmë nga modeli i demokracive perëndimore. Dhe kundërshtarët tanë kanë në mendje, pavarësisht se tentojnë ta fshehin , adhurimin e diktatorit. Qeveria e sotme, pasi evitoi festimet, nuk tha asnjë fjalë të vetme për ngjarjet shkurorëzuese të diktatorit Hoxha. Qeveria hesht për një ngjarje kaq të madhe dhe lavdiplotë për historinë e vendit. Heshtja e mbajtur nga qeveria dhe Edi Rama është e turpshme, provokuese, ogurzezë. Atyre nuk u bën zemra të lartësojnë aktet heroike. Ata promovojnë nënshtrimin në vend të mesazheve të lirisë. Modeli i tyre është përdorimi antiligjor i pushtetit, pasurimi i shfrenuar për vete. Me forcën e pushtetit synojnë të vënë nën kontroll gjithçka. Ata i konsiderojnë paratë e shqiptarëve si ti kenë paratë e tyre.”, tha Basha.
Më tej kreu i opozitës vlerësoi lart veprën e atyre që morën pjesë në aktin simbolik për rrëzimin e bustit të Enver Hoxhës. Basha tha se qytetarët ndryshuan historinë e vendit dhe i treguan botës se jemi një komb që dëshirojmë të jetojmë në liri.
“Sot jemi mbledhur të nderojmë me krenari një ngjarje kulmore në vargun e ngjarjeve që ndryshuan historinë tonë, botëkuptimin tonë 25 vite më parë për rrrëzimin e shtatores së diktatorit nga qytetarët e Tiranës, çunat e Tiranës, studentë, të rinj, intelektualë, sidomos të rinj. Rrëzimi i monumentit të Enver Hoxhës është ngjarje që i foli më hsumë se cdo ngjarje botës për Shqipërinë, por kombi tonë. Është ngjarje që i tregoi botës se në vendin tonë, pavarësisht regjimit më shtypës, prapëseprapë kishte njerëz të guximshëm dhe që donin lirinë. Rrëzimi i shtatores, është monumenti ynë i lirisë. Nderim për të gjtihë ata që u derdhën në shesh atë ditë.”, tha Basha.
