Autoritetet globale shëndetësore bëjnë thirrje që të kryejmë sa më pak pagesa me para Cash, për të parandaluar përhapjen e koronavirusit. Ekspertët e shëndetit thonë se virusi ndryshe nga sa është thënë mund të mbijetojë në sipërfaqe inerte, në një kohë të mjaftueshme sa për të infektuar, megjithëse rreziku është më i ulet se transmetimi i virusit nga njeriu tek njeriu.
Një zëdhënës nga OBSH citohet të ketë thënë në një intervistë për Telegraph-in britanik se virusi mund të qëndrojë aktiv për disa ditë në një kartëmonedhë për shkak të qarkullimit në shumë duar. Lidhur me këtë situatë Banka Angleze inkurajon njerëzit të lajnë duart dhe të përdorin solucion dezinfektimi pasi të kenë prekur para.
Ndoshta kjo shpjegon dhe faktin që virusi po përhapet me shpejtësi në shumë vende të ndryshme në botë si Irani, apo në Europë si Italia dhe Anglia.
Të njëjtin paralajmërim bën edhe drejtori i qendrës amerikane për Kontrollin e Sëmundjeve, i cili ka thënë se në material bakër dhe çelik, virusi mund të mbijetojë 2 deri në katër orë, ndërsa në sipërfaqet me material kartoni apo plastike, rezistenca është shumë më e gjatë.
Ekspertët mjekësorë thonë se viruset e këtij lloji kanë tendencë të mbijetojnë më gjatë në mjediset me temperaturë të ulët dhe me lagështi të ulët.
Koronavirusi ka shkaktuar 3200 viktima dhe 90 mijë të prekur. Në Kinë rastet me të infektuar janë ulur ndjeshëm, por një shpërthim më i madh ka ndodhur në Itali dhe së fundmi në Iran, ku 5 % e deputetëve janë infektuar me virusin.
