Vepra e kompozitorit të shquar Tish Daija rrezikon të zhduket. Një pjesë e partiturave dhe krijimtarisë së tij janë dorëzuar në arkivin e shtetit dhe pjesa tjetër e dorëshkrimeve ruhet nga familjarët. Partiturat dhe fotografitë e veprimtarisë artistike së Daisë ndër vite, të ruajtura nga familja janë ekspozuar këtë të hënë në Akademinë e Shkencave të Shqipërisë me rastin e organizmit të një aktiviteti përkujtimor për 90-vjetorin e lindjes. Gjatë aktivitetit u mbajt edhe një koncert i dirigjuar nga Eno Kocco me krijimtarinë origjinale të kompozitorit të njohur.
Por çfarë po ndodh realisht me krijimtarinë e mjeshtrit Tish Daija?! I biri i kompozitorit, Agustin Daija shprehet se krijimtaria, jo vetëm e babait të tij, por edhe e kompozitorëve të tjerë shqiptarë, duhet të dixhitalizohet. Mungesa e vëmendjes për krijimtarinë muzikore, sipas Agustinit lë të pashkruar një pjesë të rëndësishme të kulturës shqiptare. Sipas muzikologes Mikaela Minga, për Tish Dainë dhe kompozitorët e parë shqiptarë mungojnë studimet. Në konferencën përkujtimore të 90-vjetorit krijimtaria e Tish Daisë u vlerësua nga studiuesit Vaso Tole, Zana Shuteriqi e të tjerë. ma.me
