Besnik Berisha, avokati i Valon Ademit, njërit prej aksionerëve në koncesionin e aeroportit të Vlorës, i ftuar në emisionin “Të Paekspozuarit” në MCN TV, ka deklaruar se Behgjet Pacolli hodhi baltë mbi qeverinë shqiptare, duke deklaruar se ka krye takim në zyrën e ministres. Avokati deklaroi se Pacolli është paditur për mashtrim, ndërkohë që shtoi se veprimet e Pacollit cënojnë sigurinë kombëtare të Shqipërisë.
“Zoti Ademi e ka sqaruar pse e ka kallëzuar penalisht zotin Pacolli, pjesën e mashtrimit të tij kolosal, për 2A Group dhe qeverinë. Dua të asistoj në të kuptuarit e asaj që Pacolli ka deklaruar. Ka deklaruar disa fakte të pavërtetë që hedhin baltë mbi qeverinë, pretendime se janë takuar në zyrë të ministres, që është ndjerë i fyer. Zoti Pacolli me paraqitjen e tij ka sqaruar disa gjëra që për ne nuk kanë qenë të njohur dhe nuk kanë ndodhur. Ne po denoncojmë atë që është rrezik për sigurinë nacionale.
Zoti Pacolli është kallëzuar në prokurori dhe besoj se do të ketë hetim dhe akuzë kundër tij, për shkak të një mashtrimi që është gatuar dhe është agravuar, thelluar dhe jetësuar me një kontratë të dëmshme, të rrezikshme, për shkak se për ne, edhe pse është “facility agreement”, për ne është transferim, mbartje, shitje e një aseti. Këtë mund ta faktojmë përballë kujtdo. Zoti Pacolli është kallëzuar penalisht jo për faktin që është pronar në letër, por prej obstruksioneve, mashtrimeve, në vazhdimësi, mosnjohjes së të drejtës, edhe pse publikisht është deklaruar se kishte dakordancë, por nuk ishte vendosur në letër.
Ai thoshte nuk pashë firmën, një biznesmen që ka 75 vite…
Zoti Pacolli, vuri vulën e një varg gënjeshtrash të kulmuara me mashtrim dhe faturën nuk do ta paguajë vetëm 2A sepse 2A po kërkon drejtësisë, por do ta paguajë edhe shteti shqiptar”, tha Berisha.
