Një rrëfim i veçantë, nga një personazh jo i zakonshëm, për një destinacion po aq të pazakontë. Kështu nisi “Dita Jonë” në A2 CNN, me avokaten e njohur Rudina Jasini, e cila përgjatë këtyre pushimeve verore u ka bërë zili të gjithëve në rrjetet sociale, pasi ka treguar një realitet krejtësisht tjetër, unik për syrin e shumëkujt. 12 ditë eksperiencë në Namibinë e largët në Afrikë, për të cilën Rudia tregon se e kishte pasur prej kohësh në listën e gjatë të vendeve që do donte t’i vizitonte të paktën një herë në jetë.
“Ka qenë në listën e vendeve që unë kam dashur që të vizitoja sepse ishte pikërisht shumë ndryshe, një vend me një sipërfaqe shumë të madhe, mbi 800 mijë km2, me një popullsi të vogël dhe një vend shumë i fotografueshëm”, tregon ajo në A2 CNN.
Ajo e përshkruan me një fjali eksperiencën e çdo dite në Namibi.
“Ishte si një aventurë çdo ditë”, vijon avokatja rrëfimin e saj.
Kur nisi që të bënte gati valixhet drejt Namibisë, Rudina tregon se bëri edhe një pakt me veten, se përgjatë kësaj eksperience do të përballej me të papritura, prandaj çfarëdo që do i ndodhte, nuk mund t’i zbehte kurrsesi dëshirën e madhe për shijuar çdo sekondë të këtij udhëtimi. Kjo është edhe arsyeja se përse vonesën me valixhet nuk e përjetoi “si një tragjedi”.
“Vështirë që ta organizosh vetëm, ideja filloi me mua, thjesht doja të shikoja disa vende specifike, kontaktova një agjenci Namibi dhe më ofruan disa opsione, që përfshinte disa skaje të vendit, e bënte shumë të veçantë.
Të dyja valixhet nuk mbërritën me mua, kur bën udhëtime të tilla duhet të përgatitesh dhe për të papritura, valixhet nuk erdhën, një nga pasagjerët që ishte ngjitur me mua, në avion mori përsipër dhe i besova, i dhashë kopjen time të pasaportës dhe më premtoi që do i sillte te unë 4 ditë më pas. Mendoj se duhet të dalësh nga zona e komfortit, je për një udhëtim aventure dhe duhet ta përqafosh ditën me të gjithë të papriturat, ushqimi dhe njerëzit ishin shumë të mirë, ishte një vend shumë i sigurt, nuk kam pasur në asnjë moment risku. Ne kemi lëvizur pothuajse çdo ditë, atje mbizotërohesh totalisht nga natyra”, tha ajo.
Copëza të Namibisë i ka sjellë edhe në Shqipëri.
“Kam marrë me vete varëse, byrzylyk, por kam marrë edhe një kuti me mineral, gur që gjendet vetëm aty, dhe meqë elefanti është kafsha ime e preferuar, dhe ajo është punuar me këtë gur, e bleva në një komunitet, ishte nga toka e vendit që unë kam shkelur”, përfundoi Rudina në A2 CNN.
Tashmë, kjo eksperiencë ia lë vendin vrullit të punës që ka nisur që në fundgushti, mirëpo paralelisht është duke u përgatitur edhe udhëtimin e radhës, që nuk do i ngjajë të parit. Nëse Namibia ishte për të një destinacion i pazakontë, ky tjetri do të jetë shumëfish më shumë, mirëpo zgjodhi ta mbajë sekret. E vetmja gjë që zbuloi ishte bëhet fjalë “për një tokë që nuk e kanë shkelur shumë veta”…
/a.r
