Këshilli i Mandateve është mbledhur me dyer të mbyllura, ku Partia Socialiste dhe Partia Demokratike kanë arritur dakordësi për shumicën e propozimeve lidhur me rregulloren e re të Kuvendit.
Megjithatë, palët nuk kanë gjetur konsensus për disa çështje kryesore, për të cilat mbeten ende ndarje qëndrimesh.
Pikat ku nuk është arritur dakordësi përfshijnë përbërjen e sekretariatit të përjashtimeve, ku PS kërkon shumicë ndërsa PD kërkon barazi; numrin e komisioneve, ku PS kërkon ruajtjen e strukturës aktuale ndërsa PD kërkon ndarjen e çështjeve të Europës nga ato të punëve të jashtme; si dhe kohën e diskutimeve të deputetëve, me PS që propozon 5 minuta dhe PD 10 minuta.
Po ashtu, nuk ka dakordësi për raportimin e institucioneve të pavarura, ku PS kërkon raportim vetëm në komisione ndërsa PD kërkon edhe në seancë plenare, si dhe për kërkesën e PD për rritjen e numrit të këshilltarëve. Mbetet gjithashtu pa marrëveshje edhe çështja e zhvillimit të seancave plenare pas orës 22:00.
Palët kanë rënë dakord që të rifillojnë diskutimet javën e ardhshme me qëllim arritjen e një marrëveshjeje përfundimtare përpara seancës së 21 majit, që është afati i fundit për miratimin e rregullores së re.
