Djali i Klodi Lesit pyet vazhdimisht për mamanë e tij, të cilën nuk do ta shohë kurrë më. Është gjyshja e 4-vjeçarit që bën rrëfimin tronditës për të voglin, i cili nesër do të dalë nga spitali.
Nëna e tij vdiq pas plagëve të marra me thikë nga babai i vogëlushit, që e mbajti djalin pas vetes gjatë ditëve që ishte në kërkim.
Duke folur për emisionin e mëngjesit në një televizion grek, gjyshja e djalit, nëna e së ndjerës, thotë se djali do të dalë nesër nga spitali ku u shtrua për të rimarrë veten pas disa ditësh të tëra që nuk ka ngrënë ushqim të shëndetshëm.
“Tani ai është më mirë me shëndet por përsëri mbetet i dehidratuar. Pyet se ku e ka mamanë”, tha gjyshja e cila thekson se djali ka pësuar një shok të rëndë.
“Unë përpiqem t’i jap çfarë të mundem, por djali duket se nuk do të kthehet më si më parë”.
Fëmija, bashkë me vëllain dy vjet më të madh tani do të rriten nga prindërit e nënës.
4-vjeçari është monitoruar nga psikologët dhe ata janë shpresëplotë se fëmija po pikturon objekte me ngjyra të ndezura, teksa edhe vëllai tjetër i tij është duke u mbajtur nën vëzhgimin e psikologëve.
