Një ditë pas vrasjes së 37 vjeçarit shqiptar mediat italiane kanë publikuar foton dhe të dhënat e plota të tij. Sipas tyre, ngjarja ndodhi në komunën Vobarno të Breshias, ndërsa trupi i pajetë i përket Dritan Malit, 37 vjeç.
Shqiptari është vrarë brenda banesës së tij në rrugën “Prada” nga kunati i tij, vëllai i gruas. Dritani jetonte me bashkëshorten e tij Jerina Kumaraku, vëllain e tij Lulzim Mali 33 vjeç, e kunatin Laert Kumaraku, i cili jetonte me ta prej pak kohësh dhe ishte i papunë.
Sipas hetimeve të para të Policisë Italiane ka qenë pikërisht kunati i tij Laert Kumaraku i cili ka goditur me thikë Dritan Malin, pas një grindje mes tyre.
Shqiptari Laert Kumaraku ka pranuar krimin, por jo fajin e tij.
“Reagova për të mbrojtur motrën time pasi Dritani po e rrihte”, ka deklaruar Laerti gjatë marrjes në pyetje nga prokurorja e çështjes Erica Battaglia.
“Nuk ishte hera e parë që e rrihte”, është shprehur ai raporton Express.
Shenjat në trup të Jerina Kumarakut e cila pas ngjarjes është kuruar në spitalin e afërt pranë qytezës së tyre të banimit, konfirmojnë një dhunë fizike të hershme në trupin e saj.
Jerina Kumaraku, bashkëshortja e viktimës që të gjithë e thërrasin Rina, pritet të merret shumë shpejt në pyetje nga policia italiane.
Por për momentin ajo është në gjendje jo të mirë psikologjike e fizike.
Dritan Mali ka ndërruar jetë pas një plage të vetme e të thellë thike në gjoks, poshtë zemrës.
Policia italiane ka deklaruar se do të marrë në pyetje familjarët, miqtë e të afërmit e viktimës./a.m.
