Gentian Hoxha, i dënuar me gjashtë vite burg pasi vodhi nëpërmjet falsifikimit të dokumenteve rreth 500 mijë euro në bankën ku ishte i punësuar, ka rrëfyer përpara gjimnazistëve durrsakë dhe ministrit të Drejtësisë, Ylli Manjani, eksperiencën 5- vjeçare në burg.
Ashtu si Hoxha, edhe 4 të tjerë të dënuar për vepra të ndryshme penale shpalosën eksperiencat e tyre të burgut para gjimnazistëve, ndërsa në mesazhet e tyre i bënë thirrje të gjithë shoqërisë që të mos shkelë rregullat e saj, pasi liria është më e vlefshme se gjithçka.
RREFIMI
“Asnjë pasuri në botë nuk e ble dot lirinë. Para disa vitesh, unë bëra një veprim shumë të gabuar, për të cilin jam penduar thellësisht. Unë punoja me detyrë specialist marketingu pranë Bankës Kombëtare Tregtare Vlorë, në një sektor shumë të rëndësishëm. Isha vetëm 30 e ca vjeç dhe kisha karrierën përpara. Por ambicia dhe rrethanat e vështira që po përjetoja asokohe bënë që unë të ndërmerrja veprimet e para të vjedhjes. Aty nisi gjithçka”, rrëfeu Hoxha para adoleshentëve, raporton “Panorama”.
“Me anë të marifeteve të ndryshme arrita të vjedh një shumë të konsiderueshme parash në bankën ku punoja. Pra, mjafton një moment dhe jeta merr tjetër rrjedhë, ndaj duhet të jeni të kujdesshëm”, iu drejtua Gentian Hoxha gjimnazistëve dhe të pranishmeve në aktivitet, duke shtuar se ky veprim i kishte kushtuar shumë shtrenjtë.
“Ky veprim më kushtoi shumë shtrenjtë. Unë e pranoj se nuk jam dënuar pa arsye. Krahas lirisë, që nuk ka pasuri në botë që ta zëvendësojë, unë ndihem moralisht tradhtar te të njohurit e mi, duke nisur nga kolegët e deri të shokët e të njohurit në qytetin tim”, pohoi ish-bankieri, të cilit ministri Manjani, pjesëmarrës në aktivitet, ia premtoi rikthimin në detyrë pas përfundimit të dënimit, duke dhënë njëkohësisht mesazhin se të gjithë e meritojnë një mundësi të dytë.
Gentian Hoxha u arrestua nga policia menjëherë pasi u zbulua vjedhja, ndërsa u dënua me 10 vite heqje lirie. Ai ka kryer pesë vite deri më tani dhe aktualisht po vuan vitin e gjashtë dhe të fundit, pas uljes së dënimit që i është bërë. Arrestimi i tij u bë në dhjetor të vitit 2010, kur punonte në bankën e nivelit të dytë në qytetin e Vlorës.
Në atë kohë, Policia e Vlorës bëri të ditur se Gentian Hoxha, duke shpërdoruar detyrën si specialist pranë bankës, falsifikoi një sërë dokumentesh dhe arriti të përfitojë 500 mijë euro. Këto para u investuan në një shoqëri në Vlorë, në emër të një shtetasi tjetër. Pikërisht kjo shoqëri e ngritur me paratë e vjedhura në bankë i investoi ato në marrjen me qira dhe ngritjen e disa bizneseve private në qytetin e Vlorës.
MANJANI
Sot Hoxha shprehet i penduar, duke u thënë gjimnazistëve se nuk duhet të ndjekin rrugën e gabuar. Nga ana tjetër, ministri Manjani vlerësoi nismën e ndërmarrë me temë “Rinia në Fokus”, duke bërë apel për të gjithë të rinjtë që të kuptojnë rëndësinë e ligjit dhe ta respektojnë atë.
“Po të më pranoni si ‘këshillonjësin’ juaj ligjor do t’ju këshilloja se nuk ia vlen të kesh problem me ligjin. Ligjit mund t’ia hedhësh një herë, mund t’ia hedhësh dy herë edhe herën e tretë me pak zor e gjen mënyrën, por vjen një moment që fillon dhe i lan hesapet dhe larja e hesapeve përpara ligjit është një situatë që është e pashmangshme në një shoqëri me shtet”, u shpreh ministri i Drejtësisë, duke theksuar se dija dhe arsimimi është alternativa e duhur për të gjithë të rinjtë./panorama/a.k
