‘I prenë endërrat atij djali dhe mua më prenë krahët e shpresës’, më zë të dridhur kështu u shpreh Baftjar Çelaj, babai i 26-vjeçarit Indrit Çelaj, i cili u vra në Tiranë për një kondicioner.
I ftuar në emisionin ‘Me zemër të hapur’, në News 24, babai ka rrëfyer me dhimbje momentet e fundit të kontaktit me djalin e tij.
Çelaj u shpreh se Indriti kishte qenë në banesën e tyre në Mallakastër, një javë para se ndodhte ngjarja.
“Kam folur një ditë para. Një javë para e pata në shtëpi. Pastaj iku, mori edhe nipin, djalin e vajzës. Pas disa ditësh më mori, kishte marrë vajzën e madhe kishte një problem me shëndetin, bashkë me të dashurën e tij. Më thotë të vijë mamja. I them gruas, ik, sikur nuk po donte gruaja. Megjithatë erdhi në Tiranë. Në datë 21 ka qenë aty. Të nesërmen e përcjell në punë, nëna, motra, nusja. Sa vijnë në Fier marrin vesh lajmin.Kur vij këtu më thonë kanë vrarë djalin”, u shpreh ai i pikëslluar.
Më tej Baftjar Çelaj hedh akuza të rënda tek shteti dhe drejtësia, duke u shprehur se djalit i prenë ëndrrat në mes.
“Kriminelë nuk janë ata, janë këta që merren me drejtësinë. Prokurorë, gjyqtarë që i mbrojnë këta njerëz. Ç’drejtësi është kjo të vrasësh njeriun në punë. Këtë nuk kam as fjalë të them, këtë padrejtësi, një pasiguri në këtë vend. Të marrësh jetë të rinjsh në punë e sipër. Edhe dalin ca fytyra dhe flasin pa ndjenjë njerëzore. Ç’të them unë më, mua shpirti më ka ngelur mezi po qendroj, mua edhe gruas. S’kam ç’të të them më. Ca të them, i morën ëndrrat atij djali, mua më prenë krahët e shpresë, unë tek ai i kisha. Ç’më ka ngelur më mua. Nuk kam asnjë lloj besimi. Kush ka një fije ndërgjegje. Ç’garanci kam unë nga ky vend, duke shkaktuar viktima pas viktimash. Nuk kam fjalë më, nuk kam asnjë lloj shprese tek ky ved. Ju bëj thirrje ambsadave të huaja, të bëjnë drejtësi, tu japin shpresë këtyre të rinjve për të ardhmen. S’kam më, ç’të të them”, tha ai.
Indrit Çelaj u vra mesditën e 22 gushtit në Tiranë, teksa ishte duke punuar për rregullimin e kondicionerit tek vila e familjes Kusi. Pas një sherri verbal me dy vëllezërit Albano dhe Griseldo Kusi, ky i fundit ka qëlluar me armë në drejtim të 26-vjeçarit.
Një plumb në kokë i mori jetën të riut, ndërsa 2 vëllezërit Kusi janë shpallur në kërkim ndërkombëtar.
