Gianni De Biasit mbetet një personazh mjaft interesant për mediat në Itali dhe jashtë saj, që nuk reshtin nga intervistat, duke përqendruar natyrisht te suksesi i jashtëzakonshëm i trajnerit të kombëtares sonë, që po shkon me Shqipërinë në Euro 2016.
I intervistuar nga emisioni “Rruga drejt Rusisë”, De Biasi ka rrëfyer fillimet te Shqipëria, arritjen madhështore që na çon në Francë dhe planet e së ardhmes, transmeton Sportal.al.
“Kur mora drejtimin e Shqipërisë, situata e skuadrës ishte paksa e ndërlikuar, sepse kishim në dispozicion një grup lojtarësh me moshë të madhe dhe kishim shumë pak cilësi. Megjithatë, në kokën time kisha një ide të qartë, që mund të përmirësoheshim, nëse do të punonim dhe ndërtonim një grup me lojtarë të motivuar. Më pas, cilësia e lojtarëve të rinj dhe bashkimi për qëllimin e përbashkët do të bënin diferencën”.
“Virtytet e Shqipërisë? Kam një grup shumë të fortë lojtarësh, që i pëlqen të jetë pjesë e kësaj Kombëtareje dhe që jep gjithçka për shokët e skuadrës. Të gjithë e mendojmë njësoj: Së bashku mund të bëjmë gjëra të mëdha!
“Kemi hedhur shumë hapa përpara, në të gjitha drejtimet: teknik, taktik dhe në zotërimin e topit, pa e humbur lehtësisht, si më përpara. Gjithsesi, kur nisi fushata kualifikuese për Euro 2016 askush nuk e mendonte kualifikimin, edhe vendi i dytë ishte ëndërr. Objektivi në Euro 2016? Ta fitojmë (qesh). Objektivi është të kërkojmë maksimumin e mundshëm, pa pasur asnjë peng në fund”.
Trajneri ynë flet edhe për faktin se kombëtarja jonë ka në përbërje shumë lojtarë nga Kosova, shtet që së shpejti do të pranohet në FIFA e UEFA dhe ka kohë që diskutohet në lidhje me të ardhmen e lojtarëve kosovarë: “Kemi 50% të lojtarëve nga Kosova në skuadër, që kanë zgjedhur të luajnë për Shqipërinë. Pasi të njihet Kosova nga FIFA, askush nuk do të largohet nga kombëtarja shqiptare. Kemi një marrëveshje me miqtë dhe vëllezërit tanë kosovarë, sipas së cilës ata lojtarë që janë aktualisht me Shqipërinë nuk do të thirren nga Kosova”, ka thënë De Biasi.
