“Gruaja e kishte mbushur kupën, ndaj e vrava. Më kishte tradhtuar gjithë jetën, e më bënte skena xhelozie. Nuk e duroja dot kur më kërkonte llogari. E bënte gjithmonë, e më erdhi në majë të hundës.
Kështu deklaroi në polici 73-vjeçari nga Tirana, i cili goditi për vdekje me sëpatë në kokë bashkëshorten 68-vjeçare. Veli dhe Shazivare Dervishi kishin shkuar disa ditë në Golem, por qetësia u kthye në dramën e çiftit të moshuar. Menjëherë pasi ka kryer vrasjen, i shoqëruar edhe nga djali i tyre, i cili mesa duket ka hyrë pas ngjarjes në shtëpi, Veli Dervishi është paraqitur në postën e policisë së Golemit, ku ka rrëfyer ngjarjen.
Në momentin kur forcat e rendit kanë shkuar në banesën e krimit nuk kanë pasur asgjë çfarë të bënin për 68-vjeçaren, e cila duket se ka gjetur vdekjen e menjëhershme nga goditja me sëpatë. Trupi i së ndjerës u dërgua në morg dhe u tërhoq nga familjarët. Policia ka konstatuar gjatë deponimit të 73-vjeçarit që vrau bashkëshorten, se ai ishte në gjendje të pirë, çka shpjegon edhe mungesën e logjikës në arsyetimin pse ai kishte qëlluar të shoqen.
Çifti i të moshuarve jetonte në Tiranë në rrugën “Muhamet Gjollesha”, ndërsa shtëpia e krimit ndodhet pak metra larg rreth-rrotullimit të Golemit. Pas marrjes në pyetje të autorit të krimit, policia ka marrë edhe dëshminë e djalit të tyre.
bw/d/i.
