Ish-numri 10 i Kombëtares shqiptare, Altin Rraklli, i cili është autori i golit të vetëm ndaj Kombëtares së 3 Luanëve në vitin 2001, foli në Ditarin e Mesditës nga Denisa Pasholli në A2 CNN për shortin e eliminatoreve të Botërorit, duke u shprehur se me pak fat mund të kishin përfunduar në një grup pak më të lehtë.
Rraklli vlerësoi Anglinë, duke thënë se kjo kombëtare synon fitoren në Botëror dhe nuk mjaftohet vetëm me kualifikimin, ndërsa vlerësoi edhe Serbinë.
“Mund të kishte qenë më mirë. Nuk do të doja Anglinë. Ata nuk kanë objektiv kualifikimin në Botëror, por ta fitojë atë. Serbia është një skuadër e fortë dhe me traditë. Skuadrat e tjera janë në fund, por futbolli është balancuar shumë gjatë viteve të fundit dhe bëhet edhe me ato shumë e vështirë për të fituar. Megjithatë, ne nuk jemi një skuadër për t’u nënvlerësuar edhe pse duhet të përmirësohemi në lojën tonë që të kemi një shans më konkret ndaj këtyre emrave si Anglia dhe Serbia”.
Ndërkohë, sa i përket historisë me Serbinë, ai thekson se tashmë ata kanë nxjerr mësime pas asaj ndeshjeje në vitin 2014, të cilën Shqipëria e fitoi në tavolinë.
Rraklli tha më tej se Shqipëria ende nuk ka arritur të shpalosë potencialin e saj të plotë dhe nëse do ta bënte një gjë të tillë, Serbinë mund ta mposhtnim në fushën e lojës. “Ne i kemi kapacitetet e lojtarëve që të përballemi me këto kundërshtarë, por deri tani besoj se nuk i kemi shpalosur dhe kjo është detyra e Sylvinho-s që t’i vërë në dispozicion për këto eliminatore”, tha Rraklli.
