Wayne Rooney ka thënë se ai ka qenë një nga pesë “senatorët” e Manchester United që kanë “kontrolluar” lojtarët e tjerë të ekipit, në mënyrë që sir Alex Ferguson të mos ishte i detyruar ta bënte. Ish-kapiteni i United dhe Anglisë ka zbuluar sesi lojtarët e rinj që bliheshin nga klubi zhvisheshin menjëherë nga egot e tyre kur shkelnin për herë të parë në “Old Trafford”, kur ekipi drejtohej nga Ferguson.
“Unë, Ryan Giggs, Gary Neville, Paul Scholes dhe Rio Ferdinand, që donim të mirën e skuadrës, nuk do të lejonim askënd që të krijonte probleme brenda ekipit. Ne mbanim nën kontroll të gjithë. Alex Ferguson nuk kishte nevojë ta bënte një gjë të tillë”, ka thënë Rooney.
Në vazhdim, ish-sulmuesi i “Djajve” ka hedhur poshtë zërat që thonë se skuadra aktuale e Jose Mourinho-s nuk mund të përsërisë stilin sulmues të ekipit të Ferguson. “Njerëzit flasin për skuadrën tonë, veçanërisht tani, dhe thonë se ishte sulm, sulm, sulm. Por nuk ka qenë kështu”.
“Shumë ndeshje i kemi luajtur në kundërsulm. E kemi bërë këtë kundër Arsenal-it. Nuk kemi menduar asnjëherë ‘le të futemi në fushë dhe të sulmojmë’, veçanërisht kundër ekipeve të caktuara. Kishim një ekip të ndërtuar për të goditur në kundërsulm dhe e kemi bërë punën tonë në mënyrë të shkëlqyer”, ka përfunduar Rooney.
/b.d
