Super ylli portugez i Juventusit, Cristiano Ronaldo, është i emocionuar për fazën e eliminimit direkt të Ligës së Kampionëve dhe ka bërë të ditur se ai beson në potencialin e klubit të tij për ta fituar titullin e Ligës së Kampionëve.
Young Boys e pritën në shtëpi mbrëmë skuadrën e Massimiliano Allegrit për ndeshjen e fundit të fazës së grupeve të këtij sezoni të Ligës së Kampionëve. Zviceranët e fituan këtë ndeshje me rezultat 2-1, shkruan Gazeta Express.
Megjithatë, Ronaldo, i cili e ka fituar këtë titull gjatë tri viteve të fundit radhazi me Real Madridin, beson se ai do të triumfojë në këtë garë edhe këtë sezon me klubin e tij të ri, Juventusin. “Tani fillon pjesa e bukur e Ligës së Kampionëve dhe unë besoj se të gjithë jemi plotësisht gati për këtë fazë”, ka thënë portugezi 33-vjeçar, i cili nuk arriti të shënojë në ndeshjen kundër Young Boys, por ishte afër golit kur e goditi shtyllën.
“Jam i qetë sepse e di potencialin e skuadrës dhe potencialin tim. Unë mund t’i kisha shënuar lehtësisht dy gola, por kështu është futbollit. Tani duhet të fillojmë të përqendrohemi në ndeshjen tjetër”, përgatiti “Gazeta Express”. (b.an)
