Liverpool kualifikohet për në finalen e Champions League në Kiev ku do të ndeshet me Real Madrid. “Të kuqtë” e Jurgen Klopp humbën 4-2 kundër Roma, mbrëmë në “Olimpico”, por u kualifikuan me rezultatin e përgjithshëm 7-6, duke prodhuar gjysmëfinalen me më shumë gola në historinë e Champions League, pasi kishin fituar 5-2 në “Anfield Road”.
Saido Mane shënoi golin e parë për Liverpool pas dhjetë minutash lojë, pas pasimit të marrë nga Firmino. Ky ishte goli numër 29 i treshes sulmuese të Liverpool Mane-Salah-Firmino, duke thyer rekordin e BBC (Benzema, Bale, Ronaldo) me 28 gola, në sezonin 2013/14.
Gjithsesi, vetëm pak minuta më vonë, verdhekuqtë barazuan me një autogol të rrallë, për të cilin në rrjetet sociale flitet se është autogoli më i veçantë i historisë. Pas një krosimi, Dejan Lovren donte të spastronte zonën mike, duke e larguar topin, por e përplasi në fytyrën e James Milner dhe më pas topi përfundoi në rrjetë, me portierin krejtësisht të pafajshëm.
Por Liverpool u kthye në avantazh në mesin e pjesës së parë me golin Wijndalum, gjatë një rrëmuje në zonë. Ky ishte goli i tij i parë në karrierë jashtë fushe. Përgjigja e Romës erdhi me shtyllën e El Shaarawy, teksa pjesa e parë u mbyll 1-2 për miqtë.
Në minutën e 52-të të pjesës së dytë, Edin Dzeko shënoi golin e barazimit për Roma, i teti për të në këtë edicion të Champions League, duke barazuar rekordin e shënuesve të ekipeve italiane, që mbahej nga Samuel Eto’o i Inter në vitin 2011.
Golin e tretë për Romën e shënoi Nainngolan, kur kishin mbetur vetëm tre minuta lojë. Në minutën e 93-të, belgu shënoi edhe golin e katërt me penallti, kësisoj përmbysja e madhe nuk u krye… /Telesport
