Komisioni i Posaçëm i Reformës në Drejtësi ka rinisur dje punën për projektligjin e “rivlerësimit kalimtar të gjyqtarëve dhe prokurorëve në Republikën e Shqipërisë”, ose siç njihet ndryshe, procesi i Vetingut.
Gjatë mbledhjes me dyer të mbyllura, drejtuesi i misionit të EURALIUS, Rainer Deville, ka sqaruar anëtarët e komisionit se rreth 20 vërejtje të Partisë Demokratike për projektligjin e Vetingut do të mund të merren në konsideratë dhe do të integrohen në draftin e ri që do të hartojnë ekspertët. Ekspertët e BE-së kanë kundërshtuar kërkesën e opozitës për të zvogëluar rolin e Operacionit Ndërkombëtar të Monitorimit në procesin e Vetingut.
“Roli i Misionit Ndërkombëtar Monitorues nuk mund të reduktohet. Monitorimi i projektuar ndërkombëtar është një instrument i rëndësishëm për t’i mundësuar publikut të rifitojë besimin në gjyqësor”, mësohet të jetë shprehur Rainer Deville.
Por përfaqësuesi i misionit të EURALIUS ka rrëzuar disa nga pretendimet e opozitës për mospërfshirjen e Inspektoriatit të Lartë të Deklarimit, Kontrollit të Pasurive dhe Konfliktit të Interesit. Mësohet se gjatë mbledhjes, përfaqësuesi i EURALIUS ka sqaruar se rasti i ILKDP-së është përfshirë në Kushtetutë dhe si e tillë, roli i këtij institucioni nuk mund të ndryshohet.
“Procesi i rivlerësimit përdor informacionin, dosjet dhe strukturat administrative ekzistuese, në mënyrë të veçantë ILDKPKI-në për kontrollin e pasurisë dhe autoritetet policore e të inteligjencës për vlerësimin e figurës. Njohuritë dhe kompetenca e tyre është e nevojshme dhe nuk mund të zëvendësohet nga stafi i ri apo strukturat e reja. Roli i ILDKPKI-së është parashikuar në Kushtetutë dhe nuk mund të vihet në pikëpyetje. Roli i saj është që të japë të gjithë informacionin që ata kanë, por jo konkluzione, të cilat janë për organet e rivlerësimit. Zbatimi i rivlerësimit, hetimi dhe vendimi përfundimtar bëhet gjithmonë nga institucionet e rivlerësimit nën monitorimin ndërkombëtar”, ka thënë dje përfaqësuesi i EURALIUS-it raporton Panorama.
MESAZHI Në fund të mbledhjes, përfaqësuesit ndërkombëtarë kanë sqaruar se katër kërkesat që nuk mund të pranohen për t’u ndryshuar përbëjnë angazhimin e BE-së.
“Komisioni i BE-së më kërkoi që të vë në dukje se këto parime janë vendimtare për angazhimin e Bashkimit Europian në procesin e rivlerësimit, duke mobilizuar miliona euro të fondeve të taksapaguesve të BE-së. Megjithatë, BE-ja shpreson se palët do të gjejnë një mënyrë për të ndjekur thirrjen e Presidentit të Republikës për të miratuar ligjet që mungojnë sa më shpejt të jetë e mundur, pa të cilat Kushtetuta e ndryshuar nuk mund të zbatohet plotësisht”, është shprehur gjatë mbledhjes përfaqësuesi i EURALIUS-it./a.m.