Ish-snowboarderi olimpik kanadez, Ryan Wedding, i akuzuar si një nga trafikantët më të mëdhenj të drogës në botë, është ekstraduar në Shtetet e Bashkuara për t’u përballur me drejtësinë.
44-vjeçari mbërriti i prangosur në Kaliforni, i shoqëruar nga agjentë të FBI-së, pas ndalimit të tij në Meksikë.
Sipas autoriteteve amerikane, ndaj Wedding rëndojnë akuza të rënda penale, që lidhen me drejtimin e një rrjeti ndërkombëtar të trafikut të drogës.
Në një konferencë për shtyp pranë Los Anxhelosit, drejtori i FBI-së, Kash Patel, e krahasoi Wedding me figura famëkeqe si Joaquin “El Chapo” Guzman dhe Pablo Escobar.
“Ryan Wedding u shndërrua nga një snowboarder olimpik në trafikantin më të madh të drogës në kohët moderne. Ai është një El Chapo i ditëve moderne. Ai është një Pablo Escobar i ditëve moderne. Ai mendoi se mund t’i shmangej drejtësisë”.
Ryan Wedding ndodhej në listën e “10 personave më të kërkuar” të FBI-së.
Sipas autoriteteve amerikane, 44-vjeçari drejtonte trafikun e kokainës nga Kolumbia përmes Meksikës, drejt Shteteve të Bashkuara dhe Kanadasë.
Hetimet tregojnë se Wedding bashkëpunonte me kartelin meksikan të Sinaloas dhe kontrollonte një operacion që gjeneronte më shumë se 1 miliard dollarë në vit.
Autoritetet amerikane e akuzojnë gjithashtu Wedding si të përfshirë në disa vrasje që lidhen me trafikun e drogës, duke e cilësuar rrjetin e tij si një nga më të rrezikshmit në Amerikën e Veriut.
