Policia e Shtetit ka bërë sërish lëvizje në strukturat e saj. Ditën e sotme, Drejtori i Përgjithshëm i Policisë së Shtetit Ardi Veliu, organizoi një ceremoni për të vlerësuar punën e ZV/Drejtoreshës së Përgjithshme të Policisë së Shtetit Aida Hajnaj, e cila sot largohet nga detyra për të filluar në detyrën e re si Drejtore e BKH-së.
Teksa Hajnaj i dorëzoi certifikatën për shërbime të dalluara me motivacionin “Për merita të veçanta, profesionalizmin dhe përkushtimin e treguar në përmbushjen cilësore të detyrave dhe kontributin e dhënë gjatë viteve të punës për zhvillimin e vazhdueshëm të standarteve policore, në shërbim të Policisë së Shtetit”, Veliu lajmëroi se në vend të saj, është emëruar Albert Dervishaj. Tashmë Dervishaj do të jetë zëvendës drejtor i Përgjithshëm i Policisë. Më herët ka qenë drejtor i Rendit Publik.
Në vijim Veliu, ka bërë të ditura edhe disa ndryshime të tjera. Sipas njoftimit, mësohet se Drejtori i Departamentit për Marrëdhëniet Ndërkombëtare në Policinë e Shtetit Drejtues i Lartë Idajet Faskaj, është liruar nga kjo detyrë dhe është emëruar në detyrën e Drejtorit të Drejtorisë së Mbrojtjes së Dëshmitarëve dhe ka marrë gradën Drejtues i Parë.
Ndërsa Drejtori i Kabinetit të Drejtorit të Përgjithshëm, Drejtues i Parë Pëllumb Seferi, është emëruar Drejtor i Departamentit të Marrëdhënieve Ndërkombëtare dhe ka marrë gradën Drejtues i Lartë.
g.kosovari
