Irani nuk kërkon të dominojë Lindjen e Mesme, deklaroi presidenti iranian, Hassan Rohani, gjatë një bisede telefonike me homologun francez Emmanuel Macron.“Prania jonë në Irak dhe në Siri është me ftesë të këtyre vendeve për të luftuar kundër terrorizmit.
Irani nuk kërkon të dominojë rajonin”, deklaroi Rohani për presidentin francez, disa ditë pasi Franca u shpreh e shqetësuar për përpjekjet dominuese të Teheranit në Lindjen e Mesme. “Objektivi ynë është të punojmë për paqe dhe siguri dhe të shmangim ndarjen e vendeve të rajonit”, theksoi presidenti iranian.
“Pas Shtetit Islamik, duhet të luftojmë kundër grupeve të tjera terroriste”, shtoi ai.
“Franca, duke garantuar influencën dhe vendin që ka në rajon, mund të ketë një rol konstruktiv duke treguar realizëm dhe paanshmëri”, shtoi Rohani, ndërkohë që Parisi po përpiqet të shfaqet si ndërmjetësues i krizave dhe konflikteve që kanë goditur Lindjen e Mesme, përgatiti Express. (b.an)
