Aktori dhe producenti amerikan, Robert De Niro, ka thënë sot se kandidati republikan për president të ShBA-së, Donald Trump, nuk duhet të kandidojë për president sepse ai është ‘krejt i çmendur’. Trump, një biznesmen miliarder që po kërkon postin e tij të parë publik, ka shkaktuar polemika pas një valë deklaratash nxitëse që ka bërë për kundërshtaren e vet kryesore, Hillary Clinton, armët, meksikanët, myslimanët dhe veteranët e luftës, shkruan Reuters.
De Niro i ka bërë këto komente sot para një audience në Sarajevë ku e prezantoi versionin digjital të filmit “Taxi Driver”, në të cilin ai ka luajtur, për të shënuar 40 vjetorin e tij.
“S’e di, është çmenduri që njerëzit e pëlqejnë Donald Trumpin… bile ai nuk duhet të jetë aty ku është sot, prandaj na ndihmoftë zoti,” tha De Niro, komentet e të cilët u duartrokiten gjatë në Teatrin Kombëtar të Sarajevës.
“Ajo çfarë ai ka thënë kohëve të fundit është plotësisht çmenduri, marrëzi… ai [Trump] është krejt i çmendur,” shtoi De Niro.
ma.me
