KQZ vendosi dy ditë më parë që të kryhet riverifikimi i formularëve të vetëdeklarimit për 21 zyrtarë, një vendim ky i cili shtoi debatet në arenën e ndezur politike të Shqipërisë.
Kërkesën e KQZ-së për riverifikimin e formularëve të vetëdeklarimit të deputetëve dhe kryebashkiakëve, juristi Sokol Hazizaj, e ka quajtur të “çuditshme”, pasi sipas tij ligji i ka të parashikuar qartë dhe në asnjë rast nuk thotë se mund të bëhet rivlerësimi të dhënave.
Hazizaj thotë se vetëm kur vjen ndonjë informacion dhe pasi verifikohet dërgohet në një procedim penal, atëherë mund të bëhet vlerësimi i të dhënave. “Nëse një informacion vjen te kryetari, siç është parashikuar në dispozitat ligjore, pra nëse është shkelur neni dy dhe tre i ligjit, që bëhet fjalë për krimet e parashikuar në këto dispozita, kjo është çështje tjetër, por për çështje të gabimeve të emrave apo mbiemrave nuk ka pse KQZ-ja të bëjë rivlerësim të të dhënave”, tha Hazizaj për “Shekulli”.
Duke iu referuar kërkesës së KQZ-së, juristi thotë se për këto raste nuk njihet koncepti i rivlerësimit në ligj. “Në ligj, në nenin nëntë parashikohen rastet e verifikimit, pra kur del ndonjë e dhënë tjetër. Nëse kjo e dhënë ka dalë pas verifikimit të parë, kjo është gjë tjetër, por kjo nuk quhet riverifikim, quhet verifikim tjetër. KQZ-ja mund të jetë transparente (në mbledhjet e ardhshme), mbase e bën me vendimin e saj dhe thotë që për shkak të indiceve, fakteve dhe informacioneve që janë zbuluar pas verifikimit, ne do të hymë në procesin e verifikimit të dhënave të fundit, por duhet të jemi të qartë se koncept të riverifikimit nuk ka në ligj.
Vlerësimi i të dhënave nuk lejohet, por verifikimi për shkak të indiceve të reja po. Kjo lejohet edhe pas mbarimit të mandatit, sipas organeve. Nëse ligjërisht Kuvendi ose një deputet, pra institucionet që përbëjnë Kuvendin kanë zbuluar fakte të reja për të cilat, të verifikuarit nuk kanë dhënë informacion në formularin e vetëdeklarimit, atëherë institucionet përgjegjëse, siç është KQZ-ja në rastin konkret për të zgjedhurit, bën verifikimin e indiceve, pra nuk mund të bëj KQZ-ja rivlerësimin e verifikimit, kjo është fryma e ligjit”, theksoi Hazizaj.
Edhe pse kanë kaluar dy vite nga nisja e procesit të dekriminalizimi, ende nuk është bërë pastrimi i parlamentit dhe institucioneve tjera nga zyrtarë të inkriminuarduket. Dy ditë më parë, KQZ bëri me dije se do të bëhet riverifikimi për ata zyrtarë që kanë deklaruar të dhëna gabim në rubrikat e formularit, ndërkohë që Prokuroria e Përgjithshme e pati theksuar qartë se ligji për dekriminalizimin njeh vetëm plotësimin e formularit të parë. Por KQZ nuk e ka përfillur njoftimin që ka bërë publike Prokuroria, madje i ka hapur dritën jeshile të riverifikojë të dhënat e 13 deputetëve të tjerë dhe 6 kryebashkiakëve. Vendimi merret në kohën kur është kërkuar prej akuzës mandati i deputetit Artan Gaçe dhe kryebashkiakëve Tërmet Peçi Adriatik Zotkaj. Tashmë në proces përfshihet dhe ish-kryeministrit Sali Berisha dhe 12 deputetë të tjerë dhe 6 kryebashkiakë, të cilët kanë korrigjuar të dhënat e tyre.
