Një i ri nga qyteti i Vlorës ka tentuar të kryejë vetëvrasje, duke injektuar me shiringë lëndë helmuese në trupin e tij.
Sipas burimeve policore, mësohet se, I.S., 30 vjeç, banues në fshatin Zvërnec, është paraqitur në urgjencën e spitalit rajonal të Vlorës mbrëmjen e së shtunës, rreth orës 23:50.
Gjendja e 30-vjeçarit ka qenë mjaft kritike në momentin e mbërritjes në spital dhe pavarësisht ndihmës së shpejtë nga mjekët, ai vazhdon të jetë në gjendje kritike për jetën.
Kanë qenë familjarët e 30-vjeçarit ata që kanë gjetur të riun të shtrirë dhe pa shenja jete, ndërsa menjëherë e kanë transportuar me urgjencë drejt spitalit.
“Më datë 01.09.2017, rreth orës 23:50, në Spitalin rajonal Vlorë, është dërguar me ambulancë shtetasi I.S, vjeç 30, banues në fshatin Zvërnec, i cili ka injektuar me shiringë në trup lëndë helmuese dhe ndodhet në spital, në gjendje të rëndë. Punohet për sqarimin e plotë të ngjarjes”, bëhet e ditur zyrtarisht nga ana e policisë së qytetit të Vlorës.
Në dëshminë e tyre dhënë për policinë mbi ngjarjen e ndodhur, familjarët e të riut nga Zvërneci nuk kanë qenë në gjendje të përcaktojnë një shkak që e ka shtyrë atë drejt tentativës për vetëvrasje.
Pas dëshmisë së të afërmve dhe familjarëve të 30-vjeçarit, policia e qytetit bregdetar ka ngritur një grup pune, që po punon për hetimin dhe zbardhjen e rrethanave që çuan të riun drejt tentativës për të kryer vetëvrasje.
a.ç
