Ristani: PD po përgatitet për zgjedhje të parakohshme
Sekretari i Përgjithshëm i Partisë Demokratike, Arben Ristani deklaroi sot se PD po përgatitet për zgjedhje të parakohshme.
“Shumë shpejt ne mundet të kemi zgjedhje të parakohshme, por edhe nëse kemi zgjedhjet normale, janë shumë afër. PD duhet të shkojë e përgatitur”, tha Ristani në një intervistë për “News24”.
Ish-kreu i KQZ-së bëri të ditur se si pjesë e analizës për zgjedhjet lokale kreu i PD-së do të zhvillojë një tur takimesh në të gjithë vendin. Lidhur me akuzat e artikuluara së fundmi për agjentë të sigurimit brenda PD-së dhe afrimin e tyre me kryetarin Lulzim Basha, Ristani tha se nuk sheh të tillë.
“PD ka një detashment që i përket përvojës dhe traditës në PD, ka edhe një grupim të ri, që krijoi edhe një lloj freskie në PD. Ata që njihen, njihen, pjesa e re ka filluar të njihet. Janë djem e vajza me shkollimet më të mira, me grint, me dëshirë për të punuar në politikë. Sigurisht që edhe ata do krijojnë njohjen e tyre. Të thuash kush janë sigurimsat?”, tha Ristani.
