Kombëtarja shqiptare e futbollit do të orientohet drejt risive të teknologjisë në periudhën e drejtimit nga Kristian Panuçi. Tekniku i ri i përfaqësueses shqiptare ka ndërtuar stafin e tij me persona të besuar, të cilët i ka pasur përkrah edhe në eksperiencat e mëparshme, por duke sjellë edhe një risi, atë të pranisë të ekspertit të analizës video gjatë ndeshjeve.
Personi më i besuar i Panuçit në staf do të jetë zëvendëstrajneri Paolo Rodolfi, i cili ka qenë krahu i djathtë i tij edhe te Livorno e Ternana. Në eksperiencat e mëparshme si trajner, 58-vjeçari ka drejtuar skuadra në kategoritë e ulëta italiane si Valencana, Melfi dhe Kazale.
Me largimin e Alberto Bele, i cili me shumë mundësi do të ndjekë De Biazin në aventurën e ardhshme, përgatitësi i ri atletik është Alesandro Çiulini. Në staf, do të jene edhe dy pjesëtarë shqiptarë dhe duke pasur parasysh “mangësitë” në grupin që Panuçi ka sjellë me vete, pritet që të konfirmohen Ervin Bulku si ndihmëstrajner dhe Ilir Bozhiqi si përgatitës portierësh, në rolet e “trashëguara” nga epoka De Biazi.
Diçka e re për Shqipërinë është përfshirja në staf e Alariko Rosi, një ekspert i mirëfilltë i analizës video. Nëpërmjet regjistrimeve të kryera gjatë ndeshjes, ai do të nxjerrë jo vetëm të dhënat personale të kontributit të çdo futbollisti në fushën e lojës, por nëpërmjet programeve të specializuara, analizohet edhe mënyra e lojës së kundërshtarit dhe tendenca që ka për të sulmuar apo mbrojtur në një mënyrë të caktuar gjatë takimit.
Këto të dhëna kalohen direkt gjatë ndeshjes në pankinë, për t’i dhënë trajnerit mundësinë që nëpërmjet identifikimit të pikave të forta, apo të dobëta, të orientojë skuadrën në fushë për të përfituar maksimalisht nga situata e lojës. Njëkohësisht, shërben për të analizuar me shifra reale paraqitjen dhe kontributin e çdo lojtari pas ndeshjes dhe për të përcaktuar kush jep aq sa duhet e kush më pak./Panorama
