Falë riorganizimit në territor të urgjencës mjekësore, qytetarët e Qarkut të Vlorës do të përfitojnë tashmë një shërbim më cilësor dhe më të shpejtë. Rishpërndarja dhe shtimi i numrit të autoambulancave, si edhe rritja e numrit të personelit me infermierë dhe shoferë do të mundësojë funksionimin me kapacitet të plotë dhe efiçencë të lartë të këtij shërbimi në këtë qark.
Ministri i Shëndetësisë z. Ilir Beqaj dhe Drejtori i Urgjencës Kombëtare, z. Skënder Brataj prezantuan në një takim me mjekë, infermierë e punonjës të kujdesit shëndetësor të Vlorës (4/12/2016) ku ishte i pranishëm edhe Kryetari i Bashkisë së Vlorë, z. Dritan Leli, programin e riorganizimit të Shërbimit të Urgjencës Mjekësore në këtë qark, ku në sajë të këtij sistemi të ri, nga 1 autoambulancë funksionale për 54 mijë banorë, zbret në 1 për 22 mijë.
“Qarku i Vlorës ka një sipërfaqe 2706 km2, me 26 njësi, 190 njësi administrative (fshatra dhe qytete), me 1 spital rajonal, që është ky i Vlorës, dhe 2 lokalë, Delvina dhe Saranda, me një numër të autoambulancave në këtë moment 17. Me një popullsi, si qark prej 382 mijë banorësh, dhe me një mesatare 1 ambulancë nga 54 mijë, kalon në 22 mijë e 500”, u shpreh Brataj.
Gjatë fjalë së mbajtur, ministri Beqaj tha se nga analiza e bërë, nëse Shqipëria ka në gatishmëri në çdo moment rreth 130 autoambulanca mund të japë një përgjigje optimale për çdo urgjencë që mund të kenë pacentët. “Nga analiza që kemi bërë Shqipërisë në kuptimin e popullsisë, grupmoshave të popullsisë, natyrës epidemologjike, shtrirjes gjeografike, relievit, rrjetit rrugor, Shqipëria nëse ka në gatishmëri në çdo moment rreth 130 autoambulanca mund të japi një përgjigje optimale në urgjencë, që do të thotë 10-12 minuta në zona urbane të vjen autoambulanca, jo më shumë se 20 minuta në zonat rurale. Edhe ne këto objektiva duhet të mbajmë”, tha Beqaj.
Kreu i Shëndetësisë theksoi se sa më shumë t’i shërbejmë pranë qytetarëve do të fillojë të minimizohen rastet e urgjencave që paraqiten në spital me automjetet e tyre. “Sa më shumë ti shërbejmë pranë qytetarëve, një pjesë e mirë e atyre urgjencave që vijnë me automjetet e tyre, shpesh herë ndoshta të panevojshme për në spital, do fillojnë të minimizohen. Sigurisht, që ngjallja e besimit që autoambulanca vjen do dojë kohë që të ndodh, derisa është një perceptim i krijuar në vite, nuk është edhe aq i lehtë dhe për më tepër është një perceptim masiv që e kanë dhe ata që ndoshta s’kanë ardhur kurrë ndonjherë në urgjencë”, nënvizoi z. Beqaj duke shprehur besimin se vitin e ardhshëm, kjo prezencë më e madhe në territor, do ta rrisë besimin e qytetarëve.
Ministri i Shëndetësisë njoftoi gjithashtu se javën e ardhshme spitali i Vlorës do të lidhë kontratën për furnizimin me proteza ortopedike, ndërsa brenda vitit të ardhshëm, ky spital, si çdo spital tjetër, do të jetë pjesë e programit kombëtar të instrumentave kirurgjikalë të sterilizuar.
“Për pjesën e traumave, ka prapë një element shtesë pozitiv”, u shpreh më tej ministri Beqaj, duke siguruar se javën e ardhshme spitali do të lidhë kontratën edhe për furnizimin e protezave ortopedike. “Si çdo spital tjetër, brenda vitit të ardhshëm edhe ky spital do të jetë pjesë e programit kombëtar të instrumentave kirurgjikal të sterilizuar, edhe i gjithë procesi i sterilitetit në sallat tona të operacioneve”, tha ai.
