Një incident i rëndë ka ndodhur në Rio de Janeiro të Brazilit, pranë kompleksit olimpik, ku një person ka vrarë me armë një person tjetër, i cili po tentonte ta grabiste. Lajmet e para bënë të ditur se ishte zëvendëskonsulli i konsullatës ruse në Rio, por ka qenë vetë konsulli që ka mohuar një gjë të tillë, duke përjashtuar kategorikisht që ndonjë anëtar i kosullatës të ketë lidhje me këtë ngjarje.
Marcos Cesar Feres Braga, avokat brazilian, ishte me gruan dhe vajzën në makinë, duke pritur në trafik, kur iu afruan dy motoçikleta, nga të dyja anët. Njëri prej tyre i theu xhamin e makinës dhe i kërkoi që avokati t’i jepte orën. Por ky i fundit e mbërtheu nga dora dhe e tërhoqi brenda makinës dhe grabitësi mbeti i vrarë nga arma e tij, e cila u shkrep gjatë përleshjes, ndërsa tjetri u largua me shpejtësi.
Sipas gazetës Globo, avokati është zëvendëskonsull i konsullatës ruse dhe kjo gjë thuhet edhe në komunikatën e policisë.
Vladimir Tokmakov, konsull i përgjithshëm i Rusisë në Rio, thotë se asnjë anëtar i stafit “nuk ka të bëjë aspak me incidentin”.
Një lajm i mëvonshëm nga gazeta Folha shkruante se personi ishte brazilian me dokumenta false, që e hiqte veten si diplomat rus.
Ndërkaq, trupi i viktimës qëndroi për pesë orë në autostradë, teksa policia bënte hetimet.
Ngjarje të tilla janë të zakonshme në Rio, ku grabitës me motorë sulmojnë makinat që kanë ngecur në trafik dhe largohen me shpejtësi në korridorët midis korsive.
d.i.
