Pas problemeve të krijuara me aplikimet e para për Lotarinë Amerikane, të cilat sipas njoftimit të Departamentit Amerikan të Shtetit “u dogjën” të gjitha, sot do të nisë sërish rreth orës 18:00, aplikimi, i cili zyrtarisht do të mbyllet më 22 nëntor. Problemet në serverin e Lotarisë bënë që aplikimet e nisura prej datës tre tetor të jenë të pavlefshme dhe gjithçka rinis sot nga e para.
Sipas njoftimit të bërë në faqen e Ambasadës Amerikane në Tiranë, të gjithë aplikuesit mund të përdorin të njëjtat foto që përdorën dhe herën e parë, mjafton që të mos jenë të njëjtat me ato të vitit të kaluar. Të gjithë të interesuarit, pavarësisht dëshirës së madhe, duhet të aplikojnë vetëm njëherë. Nëse ju e plotësoni formularin e Lotarisë për dy apo më shumë herë, do të skualifikoheni menjëherë.
Kriteri kryesor është shkolla e mesme me kohë të plotë ndërsa çdo gjë tjetër është si më parë. Rreth 50 mijë shtetas nga e gjithë bota, do të kenë shansin të jenë fitues të Lotarisë Amerikane, të cilët më pas do t’i nënshtrohen procesit të përzgjedhjes i cili kalon në 2 faza.
Njoftimi i ambasadës amerikane
Për shkak të problemeve teknike, periudha e regjistrimit për Lotarinë DV-2019 do të rifillojë nga e para. Të gjitha regjistrimet e bëra përpara datës 18 tetor 2017 do të duhet të ribëhen në mënyrë që të merren në konsideratë. Ne na vjen keq për shqetësimin e krijuar për aplikantët e vizave të shumëllojshmërisë. Për të siguruar drejtësi dhe për të mbrojtur integritetin e procesit për të gjithë ata që janë të interesuar, ne duhet ta rifillojmë procesin e regjistrimit për këtë vit (DV-2019). Periudha e re e regjistrimit për Lotarinë DV-2019 do të hapet të Mërkurën, 18 tetor 2017, në orën 18:00 ora lokale e Shqipërisë dhe mbyllet më 22 nëntor 2017, ora 17:00 ora lokale e Shqipërisë. Nëse keni ndonjë pyetje mbi regjistrimin, jeni të mirëpritur të na shkruani këtu.
Udhëzimet e Lotarisë gjenden tek faqja e Ambasadës duke klikuar këtu.
a.ç
