Një raport i përbashkët tronditës i Organizatës së Kombeve të Bashkuara (OKB) dhe Bashkimit Evropian (BE) ka nxjerrë në dritë faturën e rëndë të 24 muajve luftë në Rripin e Gazës. Sipas vlerësimeve, nevojat për rindërtim dhe mbulimi i humbjeve ekonomike kapin shifrën e 71.4 miliardë dollarëve për 10 vitet e ardhshme.
Dokumenti detajon një krizë humanitare dhe infrastrukturore të përmasave të paprecedenta:
Dëmet materiale: 35.2 miliardë dollarë dëme direkte në infrastrukturë.
Humbjet sociale dhe ekonomike: 22.7 miliardë dollarë.
Strehimi: Mbi 371,888 banesa janë shkatërruar ose dëmtuar, duke lënë 60% të popullsisë pa shtëpi.
Shëndetësia dhe Arsimi: Më shumë se gjysma e spitaleve janë jashtë funksionit dhe pothuajse të gjitha shkollat janë të dëmtuara rëndë.
Lufta ka asgjësuar pothuajse çdo formë të jetesës ekonomike në territor. Raporti thekson se ekonomia e Gazës është tkurrur me 84%, ndërsa rreth 1.9 milionë persona janë zhvendosur nga shtëpitë e tyre, shpesh disa herë radhazi.
Gjatë 18 muajve të parë, vlerësohet se do të nevojiten urgjentisht 26.3 miliardë dollarë vetëm për të rikthyer shërbimet bazë dhe për të nisur rimëkëmbjen minimale.
Konflikti, i cili nisi pas sulmit të Hamasit më 7 tetor 2023 (ku mbetën të vrarë 1,221 izraelitë), ka prodhuar një bilanc tragjik në anën tjetër:
Viktima në Gaza: Të paktën 72,549 të vrarë, kryesisht civilë.
Grupet më të prekura: Raporti veçon gratë, fëmijët dhe personat me aftësi të kufizuara si shtresat më të dëmtuara nga kjo krizë.
