E diela rikthen nesër në kryeqytet “Tirana pa makina”, nismë kjo e Bashkisë së Tiranës e cila synon sensibilizimin e qytetarëve për të ndotur sa më pak mjedisin ku jetojmë por edhe për të bërë një jetë më aktive. Por ndërsa në qendrën e Tiranës do të mungojë zhurma e makinave, do të jenë të shumta aktivitetet e organizuara nga bashkia e kryeqytetit, për ta kthyer të dielën në një ditë festive.
Çdo qytetar është i ftuar të shijojë “CupSong Albania”, performancën e 5 mijë fëmijëve që do të përcjellin mesazhin e paqes dhe dashurisë nën ritmin unison të lëvizjes së gotave plastike. Në këtë ditë nuk do të mungojë as aktivitete të tjera jo vetëm argëtuese por që nxisin krijimtarinë apo edhe zhvillimin e ideve si: muri i dëshirave, balonat, kinemaja verore, ekspozita me nxënësit që morën pjesë te “Idetë Rinore”, këndi i mjedisit, skulpturat e parkut, panairi i koleksionistëve por edhe sporte të ndryshme.
Nga kjo javë nisma e bashkisë, “Tirana pa makina” do të zhvillohet në kryeqytet çdo të diel, deri mbylljen përfundimtare të sheshit “Skënderbej”, i cili do të vijë pas një viti me një pamje krejt të re./a.m.
