Një foto ku shfaqet Ervin Hatibi në Stamboll, atje ku e ka zhvendosur jetën prej vitesh, ka ngacmuar opinionistin Namir Lapardhaja që t’i dedikojë këtij rasti një shënim të vogël e mjaft pikant.
Ervin Hatibi njihet si ndër penat e arta poetike dhe publicstike të pas viteve ’90-të, por që vitet e fundit e ka rralluar praninë e tij në letrat apo median shqiptare duke qenë i pranishëm vetëm me një shkrim në muaj në revistën “Shenja”.
Ndaj, rishfaqja e tij, qoftë dhe më një foto, përbën në eveniment në vetvete, siç është dhe ky dedikim i mëposhtëm i Lapardhasë…
Shenim për një foto të Ervin Hatibit
Ju kujtohet Ervin Hatibi? Poeti i talentuar dhe publicisti i mprehtë. Mendja e bukur me atë imazhin e mjekrës dhe flokëve të gjatë e të kuqerremtë, bash si personazhet biblike. I riu i talentuar për të cilin vet Ismail Kadare do te shprehej dikur se “Ervin Hatibi është vazhdimësia dhe e ardhmja e poezisë moderne shqipe”.
Sigurisht që kush e kërkon Hatibin estetikisht, e gjen mes vargjeve të poezive të tij. Kush e kërkon për artin e tij të përkorë e gjen mes teksteve të kengëve mjaft poetike dhe aq të dashura për rinine e kohës, të grupit “Ritfolk”.
Kush kërkon të lexoje publicistikë poetike, gati në vargje dhe të mbushura me gjuhë, stil, metaforë dhe figuracion, mendje të mprehte, të hapur dhe mjaft bindëse, e gjen në publicistikën e tij, të përmbledhur tek “Republick of Albanania”.
Ervin Hatibin mund ta kërkosh e ta gjesh gjithkund artistikisht dhe estetikisht, por jo fizikisht. Prej vitesh ai është shkëputur nga Shqipëria dhe ka zgjedhur të jetojë në Stamboll, larg zhurmës dhe kotësisë së vendit të vet.
I lodhur dhe i zhgënjyer nga e gjithë ky absurditet i atdheut mëmë, që më së miri e gjen të konkretizuar tek poetika e tij. Hatibi i mungon prej vitesh ekranit shqiptar. Një polemist i shkëlqyer, i kulturuar dhe i pranuar prej të gjitheve, ligjërimi i tij i përzgjedhur, ka lënë një zbrazeti në debatin publik në Shqipëri.
Pas shume kohësh Ervin Hatibi u shfaq në një foto selfie, e rrallë për racën e tij, së bashku me një studiues shqiptar ne Stamboll. Siç duket për t’i nxjerr mallin lexuesve dhe ndjekësve të tij të dikurshëm dhe të sotshëm. /tesheshi/b.d
