Është rihapur procesi gjyqësor për vdekjen e legjendës së futbollit Diego Maradona, i cili ndërroi jetë në moshën 60-vjeçare si pasojë e një arresti kardiak. Seanca e re gjyqësore nis këtë të martë, pas dështimit të procesit të parë në maj 2025.
Gjyqi i mëparshëm u anulua pasi një nga tre gjyqtarët dyshohet se lejoi xhirime të paautorizuara në sallën e gjyqit për një dokumentar, duke shkelur rregullat procedurale.
Ekipi mjekësor i Maradonës akuzohet për mosdhënie të kujdesit të duhur shëndetësor. 7 persona do të përballen me drejtësinë për akuzën e “vrasjes me dashje”, megjithëse ata i mohojnë akuzat. Nëse shpallen fajtorë, rrezikojnë dënime nga 8 deri në 25 vite burg.
Legjenda e futbollit po rikuperohej në shtëpinë e tij në Tigre, në provincën e Buenos Airesit, pasi kishte kaluar me sukses një operacion për një mpiksje gjaku në tru më herët gjatë atij muaji.
Hetuesit e kanë klasifikuar çështjen si “vrasje nga pakujdesia” një krim i ngjashëm me vrasjen e pavullnetshme, pasi sipas tyre të akuzuarit ishin në dijeni të gjendjes së rëndë shëndetësore të Maradonës, por nuk morën masat e nevojshme për ta shpëtuar.
Autopsia paraprake konfirmoi se arresti kardiak shkaktoi edemë pulmonare akute, një gjendje kur lëngjet grumbullohen në mushkëri.
Një panel ekspertësh mjekësor, i angazhuar nga prokuroria për të hetuar ekipin mjekësor, e cilësoi trajtimin e dhënë në shtëpi si “të mangët dhe të pakujdesshëm”.
Sipas përfundimeve të tyre, futbollisti “do të kishte pasur më shumë mundësi për të mbijetuar” nëse do të kishte marrë trajtim të përshtatshëm në një institucion mjekësor të specializuar.
