Kryebashkiaku i Vlorës, Dritan Leli ka siguruar sot të gjithë nxënësit, kryesisht të vegjlit që shkojnë për herë të parë në shkollë për mbështetje maksimale nga Bashkia e Vlorës dhe standarde sigurie nëpër shkolla, të këtë situatë të pazakontë pandemie.
Ndërsa i uroi për fillimin e vitit të ri shkollor, Leli siguroi po ashtu prindërit se Bashkia e Vlorës do jetë pranë tyre në çdo rast.
“Uroj fëmijët e vegjël, kanë mbështetjen time personale që në një situatë të tillë do jemi pranë fëmijëve, prindërve, gjyshërve e gjysheve që të kemi një klimë sa më pozitive. Do kenë mbështetje maksimale, standard të lartë të mbrojtës së fëmijëve. Dua t’ju uroj punë të mbarë e suksese në një situatë tërësisht të pazakontë mësuesve dhe gjithë nxënësve”,- tha ai.
Leli shtoi se sot ka përfunduar diskutimet me drejtoreshën e Drejtorisë Arsimore dhe drejtuesit e shkollave ‘Ali Demi’, ‘Halim Xhelo’, ‘Mustafa Qemal Ataturk’, ‘Shaban Demiraj’, ‘Naim Frashëri’, ‘Ismail Qemali’, ‘Muço Delo’, ‘Teli Ndini’, ‘Musa Çakërri’, ‘Pavarësia’, ‘Shkolla Tregtare’ dhe shkollat e fshatrave Llakatund, Bishan, Dukat, Orikum, Novoselë, Bishan dhe Cerkovinë, për të ndihmuar të gjithë në fillimin e procesit mësimor, në rrethana jo fort të zakonshme.
“Që shkolla të përmbushë nevojat e fëmijëve dhe prindërve, për të garantuar mjedise të sigurta, nevojitet planifikim, angazhim i të gjithë aktorëve në sistemin arsimor dhe rishikim e ndryshim i planeve në varësi të ecurisë së pandemisë”,- vijoi ai.
/e.rr
