Kryetari i Partisë Demokratike, Lulzim Basha, pavarësisht se ka humbur në shumë njësi vendore e ka lexuar votën e 21 qershorit si një fitore për forcën që ai drejton. Në një konferencë për mediat, Basha ka thënë se këto zgjedhje treguan se PD po ngrihet.
“Rezultatet paraprake tregojnë se këto zgjedhje janë një hap i madh për Partinë Demokratike. Harta territoriale e manipuluar, përfshirja e bandave të lidhura me pushtetin për të trembur kandidatët, pavarësisht presioneve ndaj administratës dhe përfshirjes së institucioneve në fushatë, pavarësisht transferimeve të paligjshme të mijëra zgjedhësve, pavarësisht blerejes masive të votës, PD me aleatët ka hedhur një hap të madh të ringritjes, ka fituar një numër të madh bashkish, duke ngushtuar diferencën në shumë bashki të tjera”, deklaroi Basha.
Kreu i demokratëve në këtë dalje të parë pas zgjedhjeve, nuk la pa akuzuar as dyshen qeverisëse Rama-Meta, që për Lulzim Bashën kanë blerë votat e qytetarëve. Ai tha se për këtë fenomen ka qënë në kontakt të vazhdueshëm me faktorin ndërkombëtar.
Basha kishte dy mesazhe për procesin e numërimit, njërin për komisionerët dhe tjetrin për dy krerët e mazhorancës.
“Të vazhdohet procesi i rregullt dhe transparent i numërimit të votës së shqiptarë. I bëj thirrje dyshes Rama-Meta që të heqin dorë nga çdo përpjekje për të shtrirë parregullsitë në këtë fazë të procesit zgjedhor”, deklaroi Basha.
Për opozitën, 21 Qershori ishte një mesazh i qartë kundër mazhorancës dhe ndarjes së re administrative.
“Zgjedhjet treguan që pazaret që shtuan vagonat e babëzisë në trenin e Qeverisë, që koalicioni i tyre ka pësuar një braktisje të qytetarëve, një braktisje për Ramën dhe Metën, kundër ndarjes administrative të bërë në kundërshtim me vullnetin e tyre, është votë kundër babazisë.Nëse e shihni ka një braktisje të mazhorancës në rangun 200-250 mijë vota dhe ka një rritje të PD në mbarë vendin”, deklaroi Basha.
