Këngëtarja e njohur, Rezarta Shkurta, ka publikuar ditën e sotme në profilin e “Instagram”-it një video ku shfaqet e bija e saj me stërgjyshen, Nexhmie Hoxhën, të venë e ish-diktatorit, Enver Hoxhës.
Në fakt videoja e shpërndarë nga këngëtarja është parë edhe më herët në profilin e saj në rrjetin social, ku ajo u përball me një lumë komentesh dhe kritikash.
“Ndjeva mallëngjim”, shkruan Rezarta Shkurta për videon në fjalë duke e cilësuar Nexhmije Hoxhën si të vetmen shëmbëlltyrë të ëmbël të gjyshes për të.
Ndër të tjera, këngëtarja shkruan se ajo e ka njohur të ndjerën si një gjyshe të mençur, duke theksuar faktin se “nuk e njeh dhe nuk do ta njohë politikën.”
“Tek po bëja scroll postimeve, më doli para kjo video, dhe ndjeva mallëngjim.
Në fëmijërine time, giyshërit nga babi nuk arrita t’i njoh. Gjyshen nga mami e humba kur isha e vogël. Ti ishe e vetmja shëmbëlltyrë e ëmbël e gjyshes për mua.
Unë nuk e njoh politikën, e nuk dua ta njoh. Unë të njoha ty si një gjyshe të mençur, që të gjeja duke shkruar, dhe të lija sërisht me penë në dorë”, shkroi ajo në Instastory.
Kujtojmë se 3 vite më parë këngëtarja, e cila është e martuar me Ermal Hoxhën (djali i djalit të madh të diktatorit Enveri Hoxha, Ilir Hoxhës), u përball me shumë komente jo vetëm nga ndjekësit por edhe nga personazhe të njohur. Videoja është shpërndarë për herë të parë nga Rezarta Shkurta më 26 shkurt 2020, kur ndërroi jetë Nexhmije Hoxha.
Në një postim saj, Rezarta shkruante se për të “familja është trashëgimia më e shtrenjtë. Ajo gjithashtu shtoi se është e lumtur se vajza e saj, Hera ka kujtime kaq të bukura me stërgjyshen.
“Nuk ka lumturi më të madhe nga thellësia e shpirtit për mua si nënë, që vogëlushja ime ka këto kujtime të paçmueshme me stërgjyshen e saj, që numëron denjësisht 98 vite. Familja është trashëgimia më e shtrenjtë”, janë fjalët që Rezarta shkroi 3 vite më parë bashkëngjitur me videon, ku në fund del edhe ajo teksa përqafon Nexhmie Hoxhën./m.j
