Sulmuesi kuqezi Rei Manaj duket se do të qëndrojë në Serinë A. Pak orë pas publikimit të lajmit nga gazeta më e madhe sportive në Itali “Gazzetta dello Sport”, se gjermanët e Eintraht Frankfurtit dhe spanjollët e Sporting Gijonit kishin shfaqur interes për Manajn, një tjetër klub nga Seria A kërkon kartonin e tij.
Po kjo e përditshme thotë në rubrikën e merkatos se drejtuesit e Peskarës kanë nisur sot kontaktet me zikaltrit e Interit dhe përfaqësues të futbollistit.
Marrëveshja e huazimit të sulmuesit pritet të mbyllet gjatë darkës. Peskara u ngjit sezonin që kaloi nga Seria B, në Serinë A dhe klubi ka nisur një fushatë përforcimesh për përballjen me më të mëdhenjtë.
Një ditë më parë Peskara kërkoi edhe futbollistin e Kombëtares shqiptare Arlind Ajetin, duke i ofruar një shumë prej 350 mijë eurosh në vit, përfshirë edhe bonuset në të ardhmen, por mbrojtësi e refuozi këtë ofertë./Panorama/a.k
