Presidenti i Rusisë, Vladimir Putin, po kërkon që Ukraina të heqë dorë nga i gjithë territori i rajonit lindor të Donbasit, të mos e synojë anëtarësimin në NATO, të mbetet shtet neutral dhe të mos pranojë trupa perëndimore në territorin e saj.
Sipas agjencisë së lajmeve “Reuters“, e cila lajmin e bazon në tri burime të afërta me diskutimet e nivelit të lartë në Kremlin, në propozimin e tij të ri, presidenti rus ka këmbëngulur që Ukraina të tërhiqet tërësisht nga pjesët e Donbasit që i ka ende nën kontroll.
Si këmbim, Moska do të ndalej në vilat aktuale të frontit në Zaporizhia dhe Kherson, shtuan ato.
Rusia ka nën kontroll rreth 88 për qind të territorit të Donbasit e 73 për qind të Khersonit e Zaporizhias, sipas vlerësimeve të Shteteve të Bashkuara.
Burimet thanë se Rusia gjithashtu është e gatshme që të dorëzojë pjesë të vogla të rajoneve Kharkiv, Sumy dhe Dnipropetrovsk të Ukrainës si pjesë e një marrëveshjeje të mundshme.
Ministri i Jashtëm i Rusisë, Sergei Lavrov, tha të enjten se Putini është i përgatitur që të takohet me Zelenskyn, por se fillimisht duhet të punohet në të gjitha çështjet dhe se është në pikëpyetje autoriteti i presidentit ukrainas për të nënshkruar një marrëveshje të paqes.
Ndërkohë, presidenti amerikan Donald Trump u shpreh një ditë më parë se nëse do të ketë paqe, do të mësohet brenda dy javëve të ardhshme, dhe nëse ajo nuk do të arrihet brenda kësaj kohe, SHBA-ja do të ndjekë një tjetër strategji.
Trump tha më herët se Ukraina nuk mund ta fitonte luftën pa sulmuar në territorin rus, pasi do ishte si një skuadër e cila luan vetëm në mbrojtje.
