Drejtoresha e CIA-a, Gina Haspel ka dëgjuar gjatë vizitës së saj në Turqi një incizim të zërit, në të cilin dëgjohet vrasja e gazetarit saudit, Jamal Khashoggi, i kanë thënë dy burime agjencisë së lajmeve Reuters. Përfaqësuesit e CIA-s dhe inteligjencës turke nuk kanë komentuar nëse Haspel ka dëgjuar incizimet.
Arabia Saudite fillimisht ka mohuar përfshirjen në zhdukjen e Khashoggit më 2 tetor, mirëpo një zyrtar saudit ka thënë më pas se vdekja e tij ka ndodhur në konsullatën saudite si rezultat i një përleshjeje.
Turqia ka hedhur poshtë përpjekjet e sauditëve për të arsyetuar vdekjen e tij me të ashtuquajturin “operacion të ashpër”, duke i kërkuar Mbretërisë Saudite të kërkojë përgjegjësit e vrasjes, që ka nxitur pakënaqësi ndërkombëtare.
Sipas burimeve, Haspel, e cila ka arritur në Turqi të hënën, ka dëgjuar audio-incizimet.
Ministri i Jashtëm turk, Mevlut Cavusoglu, ka thënë të enjten se Ankaraja ka ndarë informacione me disa palë që kanë kërkuar informacione shtesë.
Ai u ka thënë gazetarëve se Turqia nuk do ta dërgojë rastin në ndonjë gjykatë ndërkombëtare, mirëpo do të ndajnë informacionet varësisht nga kërkesat. Presidenti i Turqisë, Recep Tayyip Erdogan ka thënë se Khashoggi, kolumnist i Washington Post dhe kritik i udhëheqësisë saudite është vrarë bazuar në një plan paraprak.
Ndërkohë princi saudit, Mohammed bin Salman është zotuar, në komentet e tij të para publike lidhur me këtë çështje se vrasësit do të dërgohen para drejtësisë.
ma.me
