Në Galerinë Kombëtare të Arteve do të prezantohet për publikun më 10 shtator në sallën e ekspozitave të përkohëshme, ekspozita “Maks Velo – Retrospektivë”.
GKA njofton se ekspozita e kuruar nga Suzana Varvarica Kuka, është një prezantim i retrospektivës së krijimtarisë së piktorit dhe arkitektit Maks Velo dhe do të shpalosë për publikun gjatë muajit shtator, panoramën më dinjitoze të ekspozimeve të artistit.
“Maks Velo – Retrospektivë” do të bëjë publike punimet e artit të Maks Velos, të cilat janë në teknikat e pikturës në vaj e akrilik, në teknikat e grafikës në lavi dhe bojë kine, në vizatim laps e pastel, në skulpturë bronz e allçi, ku përmes tyre i propozohet publikut të zbulojë ritmin e krijimit, ndikimet mbi krijimin, transformimet dhe provat e artistit nga një gjini në tjetrën, si dhe nga një teknikë në tjetrën.
Veprat e ekspozuara demostrojnë në mënyrë të qartë trysnitë e kohëve mbi artistin.Vetë Galeria Kombëtare e Arteve thekson se, duke njohur personalitetin e Maks Velos, ka zbuluar jetën artistike dhe mbijetesën e tij njerëzore që nga vitet 1960-të e deri në ditët tona.
Proçesi i njohjes e veçon artistin Maks Velo për vlerat e veçanta që mban krijimtaria e tij, për rrugën “rebele”, sesi ajo u zhvillua në kohët komuniste, për mbijetesën e artistit në mungesë të lirisë, për këmbënguljen e tij në debatin social, politik dhe ekonomik mbi cilësinë e jetës së individit dhe të shoqërisë shqiptare.
Në këtë atmosferë zhvillimesh të artit shqiptar, ekspozita retrospektivë e Maks Velos dhe albumi që shoqëron ekspozitën janë shenja vetjake e artistit në hapësirën e madhe të saj.Ekspozita “Maks Velo – Retrospektivë” do të qëndrojë e hapur deri më datë 04 tetor 2015.
